Tuir relatóriu ne’ebé Deputadu sira simu katak kontratu negósiu ba presu ikan tubaraun besik tonelada 43. Ministériu Agrikultura no Peskas (MAP) fa’an ba kompañia Fuzhou Hong Long Ocean Fishing Co. Ltd husi Xineza sosa kada ikan tubaraun tonelada ida fa’an de’it ho presu $150.

Ho informasaun ne’e, Natalino konsidera, governu fa’an ikan tubaraun ho presu baratu liu no halakon fali osan estadu.

“Tuir informasaun ne’ebé ami asesu katak ikan sira ne’ebé kompañia sira foti ne’e kada tonelada ida ho fa’an ho folin $150,” dehan Natalino bainhira levanta problema ne’e iha plenária Parlamentu Nasionál, Segunda (20/02).

Ho problema ne’e, nia husu ba meja Parlamentu Nasionál atu haruka karta ida ba ekipa Ministériu Agrikutlura no Peskas bele esklarese kontratu ne’ebé Governu halo ho kompañia.

Governu mós presiza esklarese informasaun loloos ba PN no povu tomak hodi hatene atividade peska ró 15 iha Tasi Mane.

Deputadu ne’e mós lamenta bazeia ba informasaun ne’ebé sira simu ró 15 ne’e halo atividade peska uza fali rede arastu hodi estraga ikan ki'ik lubuk ida mate no ambiente iha tasi okos hanesan ahu ruin ne’ebé ikan hela hodi tulun ba hetan estragus.

Fatin hanesan, Deputada Brígida Correia husu atu governu tenke informa klaru problema hodi hapara lai atividade ró sira ne’e.

Antes ne’e, Deputadu, José Luis Guterres husu Governu atu hapara atividade kompañia, Kompañia Fuzhou Hong Long Ocean Fishing Co. Ltd tanba sira uza rede arastu estraga ikan barak.

Governu Timor-Leste lansa atividade peska ró 15 iha 11 Novembru 2016 hodi halo sira nia atividade peska iha tasi mane.

Entretantu Diresaun Jeral Peska koordena ona ho liña ministériu seluk sei halo investigasaun ba problema ne’e.