Tuir dadus hosi Institutu Apoiu Dezenvolvimentu Emprezariál (IADE) rejista Timoroan 3.732 kompostu hosi feto 1892 no mane 1.840 hala’o ona formasaun emprezariál ba partisipante na'in 2.307 iha sentru emprezariál 12 iha munisípiu sira hotu no hala’o servisu akonselamentu no akompaña ba emprezáriu na’in 516.

Primeiru Ministru, Rui Maria de Araújo hateten, governu sei kontinua kapasita nafatin setór privadu Timor-Leste sai parseiru ba governu partisipa iha dezenvolvimentu ekonomia ki'ik too boot.

Rui dehan, iha Planu Estratéjiku Dezenvolvimentu Nasionál (PEDN) 2011-2030 iha planu lubuk ida maka haree liu ba ekonomia Timor hosi setór oin-oin.

Nu’udar nasaun foun, Timor-Leste mós partisipa reuniaun forum ekonomia nasaun CPLP –ASIA ho objetivu atu hadi'a ekonomia TL.

“Ita hetan husi Konsellu Jerál Organizasaun Mundiál Komérsiu (KJOMK), estadu hanesan observadór, ita hala’o ona forum ekonómiku globál ne’ebé simu partisipante liu 300 mai husi kontinente 5, liu-liu husi nasaun membru CPLP sira, ita fó ona finansiamentu ba impureza ki’ik no médiu hamutuk 133 iha rai laran,” dehan Rui ba jornalista iha Palasiu Governu, foin lalais ne’e.

Ba oin, governu sei kontinua dezenvolve nafatin atividade agrikultura povu Timor-Leste no setór ekonomia seluk tan.