Koordenadór AIFESA, Abílio Oliveira Cirilo hateten, sira simu informasaun balun husi Ministériu Saúde (MS) katak kompañia balun investe bee maibé laiha kualidade.

“Ami sei halo inspesaun surpreza ida ba iha kompañia sira hodi haree, kuandu bee Gota la prienxe nia kritériu. Maski sira lori bee ba teste iha kolaboradora maibé la prienxe entaun ami sei foti bee ne’e lori mai halo fali teste hodi haree se la prienxe duni ami sei haruka selu multa,” dehan nia, iha knaar fatin, Matadouru, horisehik.

Nia esplika, kuandu husi parte Ministériu Saúde mak dehan loos ona, entaun AIFESA to’o iha fatin haree foti de'it, tanba MS instituisaun ida ne’ebé entidade, entaun AIFESA la duvida ona kuandu MS hatete hanesan ne’e bee ne’e la prienxe kritériu ne’e signifika loos.

Aleinde halo inspesaun ba negosiante sira kona-ba lisensa regra, halo mós despaza konsumidór liu husi kontrolu hodi haree produtu nia kualidade, foti haree laiha kualidade tenke fó sansaun.

“Kuandu ami halo ona inspesaun mak hetan produtu balun ne’ebé halo ema duvida, entaun tenke foti lori ba halo teste iha laboratóriu, ami atu dehan de'it ami seidauk iha laboratóriu entaun ami sei lori ba iha Ministériu Saúde,” informa Abílio.

Nia hatete, AIFESA sei tun direita ba iha empreza sira halo inspesaun no husu klaru informasaun ne’ebé fó sai husi MS ne’e loos ka lae? Kuandu bee Gota mak la prienxe duni kritériu, entaun AIFESA tun sei foti hotu ne’e konsidera liu prazu no husu komunidade sira labele konsumu.

Antes ne’e, Jornál INDEPENDENTE tenta atu konfirma rezultadu Ministériu Saúde nian ba parte kompañia Gota, maibé dehan seidauk iha tempu atu bele fó klarifikasaun. Nune’e, husu ba média ne’e atu hein to’o sira kontakta fali.