Sexta, 06 Dezembru 2019 | Login
RYLA-TL Fó Formasaun Lideransa ba Joven 86 RYLA-TL Fó Formasaun Lideransa ba Joven 86

SEJD Abertura Treinamentu Lideransa ‘Harahun Limitasaun’ Featured

DILI: Sekretáriu Estadu Juventude no Desportu (SEJD) Nelio Isaak Sarmento hala’o abertura ba treinamentu lideransa ne’ebé realiza husi Rotary Youth Leadership Awards (RYLA-TL).

‘’Harahun Limitasaun’’ sai tema prinsipál ba treinamentu dala-sia husi Rotary Youth Leadership Awards-Timor Leste (RYLA-TL).

Objetivu husi treinamentu ne’e atu fó kapasitasaun ba juventude sira iha área lideransa hodi transforma foin sa’e  nia hanoin no mentalidade atu sai lider ba nian aan no sosiedade hodi kontribui ba prosesu dezenvolvimentu Timor Leste iha futuru.

Treinamentu ne’e partisipa husi juventude 86 kompostu husi  mane na’in 43 no feto 43 ho idade 19 to’o 28 husi munisípiu 12 inklui Rejiaun Autónomu Espesiál Oekusi no Ambenu (RAEOA).

Iha Abertura, Sekretáriu Estadu Juventude no Desportu (SEJD) Nelio Isac Sarmento hateten,  programa husi RYLA-TL ne’e importante tebes tanba bele forma ona juventude kuaze 800 iha área lideransa.

“Agora ita presiza joven sira ne’ebé maka iha karakter di’ak atu ense ita nia independénsia ho sentimentu domin ba ita nia nasaun,’’ dehan nia iha Maloa-Dili, horisehik.

Politika Oitavu Governu, nia dehan, atu oinsá bele bele forma joven sira iha karakter lideransa nian ne’ebé di’ak atu tane aas estadu no nasaun iha futuru.

Tanba ne’e, nia husu ba juventude sira atu prepara aan tanba futuru nasaun iha sira nia liman.

Governante ne’e hatete, sei suporta nafatin RYLA-TL atu fó formasaun ba juventude sira atu sai maduru iha futuru hadi foti desizaun no partisipa ativa iha dezenvolvimentu nasionál.

Nia husu mós ba RYLA-TL atu hakbesik nafatin ba governu liu husi SEJD hodi hametin kooperasaun atu forma karakter joven sira.

Iha fatin hanesan,  Diretór Rotary Youth Leadership Awards –Timor Leste (RYLA-TL) Alberto Quintão de Oliveira dehan formasaun ne’e ho objetivu atu eleva juventude sira nia koñesimentu iha área lideransa nian atu sau lideransa di’ak, sai servidór ne’ebé di’ak iha familiariza, komunidade no nasaun TL.

Tuir dadus, nia dehan, atividade husi RYLA-TL  hahú dahuluk too da-sia  konsege produs ona juventude na’in 800.

Ba treinamentu da-sia ne’e durante semana ida hahú Domingu (09/09) too Sábadu (16/09), formadu sira sei akompaña no rona opiniaun husi membru governu, sosiedade sivíl, ativista no eis titulár atu fahe esperiénsia atu inspira juventude sira.

Hafoin remata formasaun, formadu 86 sei estájiu iha organizasaun parseiru sira hanesan Alola Fundasaun, HIAM HEALT durante fulan haat.

Rezultadu husi programa ne’e, nia dehan, juventude barak mak hetan ona servisu, balun hetan bolsu estudu no balun fila ba servisu ho komunidade.

Tuir planu, Diretór ne’e dehan, esforsu makaas atu bele realiza formasaun lideransa iha munisípiu sira hotu.

Entretantu, Reprezentante Woodside And Sunrise Join Venture António Campos hato’o parabéns ba juventude sira ne’ebé maka hetan ona oportunidade hodi tuir formasaun lideransa ne’ebé maka organiza husi RYLA-TL.

Nia hatutan, Woodside apoiu programa RYLA komesa husi 2012 tanba fiar katak formasaun lideransa mak bele kapasita di’ak liu tan juventude sira nia koñesimentu hodi kontribui ba dezenvolvimentu TL.

“Ami iha kometimentu boot atu apoiu programa sira ne’e ba oin hodi bele kapasita ita nia juventude sira iha área lideransa nian,” dehan nia.

Nia husu ba Juventude sira atu uza oportunidade ne’e ho di’ak hodi rona esperiénsia husi oradór sira.

Serimónia ne’e partisipa husi embaixadór Austrália, Embaixadór Nova Zelándia, Rotary Districk, Presidente Rotary Club of Dili Lafa’ek, Sosiedade Sivil no juventude sira.

Read 3531 times
Rate this item
(0 votes)
MidAd1