Molok ne’e, Sekretariu Estadu Leovigildo da Costa Hornai promete sei konvida fila fali FFTL atu partisipa iha enkontru triparte hafoin abertura ba Liga Futebol Amadora epoka 2017.
Abertura ba LFA epoka 2017 iha Munisipiu Baukau no Bobonaro remata ona iha semana kotuk, maibé SEJD ladauk organiza enkontru triparte no karta konvite ba FFTL hodi partisipa.
Hanesan públiku hatene katak iha enkontru triparti ne’ebé SEJD konvoka iha fulan Fevereiru nia laran la hetan partisipasaun husi FFTL ho razaun FFTL so hakruk de’it ba ninia estatuta no estatuta AFC-FIFA.
Bainhira hetan konfirmasaun ba karta konvite foun ba FFTL, Leovigildo hatete, nia parte sei halo preparasaun relatoriu interna SEJD.
“Ha’u sei preparativu internu nian no sira seluk, imi haree depois Liga Basket, Liga Futebol Amadora (LFA), depois asuntu seluk ne’ebé ha’u tenke prepara iha semana rua nia laran mak relatóriu interna,” dehan Sekretariu Estadu iha nia knar fatin, Sional Lesidere, horseik.
Maske nune’e, nia promete iha fulan Marsu nia laran nia parte sei haruka karta ba FFTL atu halo enkontru ho parte SEJD.
Hafoin enkontru ho SEJD, nia dehan, nia parte sei ko’alia mós oinsa atu hala’o enkontru ho LFA no kbulu sira.
Leovirgilio afirma, daudaun ne’e ninia mandatu besik remata ona, tanba ne’e tenke prepara kondisaun ne’ebé di’ak atu oinsá bele buka solusaun ba prolema ne’e.
