Karreta iha Sidade Dili Para Arbiru De’it

By Lígia Noronha Janeiru 24, 2017 2543

DILI: Deputadu Komisaun E Parlamentu Nasionál  lamenta no observa kondutór barak lori karreta sei para arbiru iha kapitál Dili hodi hamosu engarrafamentu.

Deputadu PN, Manuel Castro dehan, nia lamenta bainhira haree iha fatin públiku sira hanesan, audian, Banku Mandiri no BNU nia oin dala ruma kondutór sira lori karreta para iha estrada ninin sa'e too trotoar leten no pior liután maka karreta balun para iha fatin pasadeira (zebra kros).

“Ita haree dala barak karreta mikrolete sira ne’e kuandu para sira naran para arbiru de’it, dala ruma fali iha lampu merah oin depois para tan fali ba dalan kruzamentu nian ne’e,”dehan Manuel liu husi iha PN, Segunda (23/10).

Nia dehan, tuir loloos governu liu hosi Diresaun Nasionál Transporte Terrestres (DNTT) tenke fó formasaun kle’an ba sidadaun hotu ne’ebé atu hasai karta kondisaun tenke hatene regra sinais tránzitu hodi labele para arbiru.

Manuel dehan, ohin loron karreta ho motór lubuk ida dala ruma liu ba mai atu sosa sasán ruma iha loja para fali iha estrada klaran hodi hamosu engarrafamentu.

Iha fatin Deputada Jacinta Abucau dehan, problema ne’e dala barak akontese hela de’it  kapitál Dili, maibé parte governu nunka ba halo sosializasaun.

“Ita lao ba iha Dili laran karreta ho motór kuaze para arbiru de’it. Ida ne’e kulpa governu nian tanba la fó formasaun ba kondutór sira,”dehan Jacinta.

Nia husu atu parte DNTT no polisia tránzitu tenke halo operasaun hodi prende karreta ho motór ne’ebé para arbiru para sira bele hatene regra.

Rate this item
(0 votes)

Independente Digital TV