Tuir Deputadu, Eládio Faculto, husu atu governu liu hosi Ministériu Edukasaun tenke haree kestaun ne’e hanesan problema boot ida, tanba estudante balun dala ruma osan la iha atu sosa jornál ho folin karun.

Deputadu Eládio konsidera polítika governu obriga estudante sosa jornál ne’e hanesan esplorasaun ki'ik ba estudante sira.

“Ha’u hanoin ministériu labele halo kontratu ho mídia eletrónika ou média sira ne'ebé atu esplora ita nia estudante sira kada jornál tenke sosa ho $5.00 ita  nia povu nia oan sira mai husi foho tan mai teste lakon tan depois sosa jornál ida kada $5.00, ne’e karun tebes”, dehan Eládio ba jornalista  iha PN, Segunda (23/01). 

Nia apoiu KAK atu investiga problema ne’e para bele hato’o rekomendasaun ba governu hodi muda polítika ne’e labele akontese iha tinan oin.

Eládio sujere di’ak liu governu atu fó sai naran, estudante sira ne’e públika de’it liu hosi formuláriu hodi kopia para fahe tuir departamentu hodi estudante sira bele ba haree sira nia naran.

Antes ne’e, KAK halo ona investigasaun ba problema ne’e, maibé públiku rasik seidauk rona relatoriu investigasaun hosi KAK.

Entretantu Manajer Jornál Matadalan, Aurélio informa katak, sira halo kontratu ho Ministériu Edukasaun públika naran kandidatu estudante UNTL iha sira nia laran gratuita, no jornál ezemplár ida sira fa’an ho presu $2.

Aurelio dehan, KAK rasik ba investiga problema ne’e, no sira rasik informa ona kestaun ne’e tuir akordu ne’ebé Matadalan halo ho Ministériu Edukasaun.

Nia rasik mós rejeita jornál fa’an ho presu $5 ne’e laloos, tanba iha akordu sira fa’an jornál $2.

Antes ne’e, estudante foun UNTL lubuk ida lamenta kada estudante obrigatoriu tenke sosa jornál.