Kuarta, 20 Novembru 2019 | Login
Ministru Justisa Ministru Justisa

Salva Kazal Timor-oan iha Indonezia Hanesan Milagre Featured

DILI: Maske governu Timor Leste esforsu hela atu salva kazal Timor-oan ne’ebé hatama droga ba Indonezia, maibé konsidera todan tanba lei Indonezia no Timor Leste nian ne’ebé la hanesan. Ministru Justisa Manuel Cárceres rasik deklara presiza milagre atu salva kazal Timor-oan ne’e.

Ministru Justisa hatete, Timor-oan na’in rua ne’e tama iha teritoriu Indonezia, viola no kontra ona lei Indonezia nian.

“Ita halo esforsu tomak hodi salva guarda ita-nia sidadaun na’in rua nia direitu ba moris tanba  prosesu sei hanesan milagre, tanba entre nasaun rua, lei hanesan,” dehan Ministru Cárceres iha palasiu governu, Kuarta (03/07).

Ministru ne’e dehan, prosesu negosiasaun la’o hela, maibé governu Timor Leste labele impoin, tanba bainhira TL kaer sidadaun Indonezia, governu Indonezia mós la impoin.

“Buat hotu la'o tuir prosedimentu, nune’e ita labele obriga sira (Indonezia) tuir ita-nia hakarak.”

Kona-ba akordu extradisaun, Ministru ne’e dehan, governu Timor Leste bele aplika hodi koko atu lori fila nia sidadaun ba julga iha Timor Leste.

“Karik iha ema diplomata ruma mak soke ita-nia sidadaun sira, hanesan uluk tempu UNTAET nian, ita halo akordu karik, sira soke ita-nia sidadaun bele ba julga iha sira-nia rai, (maibé) ita agora laiha (akordu extradisaun) ho Indonézia.”

Ministru ne’e afirma, se akordu extradisaun ne’e iha, governu Timor Leste bele aplika.

“Tanba ne’e mak oras ne’e daudaun governu halo hela diplomasia, maibé la obriga Indonézia, nune’e ita prepara aan didi'ak lai atu ema labele tesi ita-nia ai kloor.”

Hatan kona-ba governu karik hili ona advogadu hodi fó asistensia ba kazal Timor-oan iha Indonezia, Ministru Cárceres hatete, prosesu ne’e seidauk to’o iha advogadu.

“Ita seidauk to’o iha advogadu, governu halo nia kna'ar tuir nia kompeténsia, saida mak halo iha diplomasia atu nune’e loron ida sira presiza ita-nia advogadu, ita haruka ba, tanba ita labele impoin iha tribunál Indonézia, haruka ita-nia advogadu ba atu ema labele dehan ita ba manda ema-nia lei no ema-nia rai,”.

Nia dehan, Timor Leste presiza halo asaun ho kakutak malirin no labele ansi atu nune’e labele fó liu tan todan ba kazal Timor-oan iha Indonezia.

“Maski ita ko'alia barak maibé ema aplika lei ema nian no ita laiha podér atu dehan sira aplika lei (ida) ne’e,” dehan nia.

Daudauk ne’e, nia dehan, Ministériu Públiku no Tribunal Rekursu Timor Leste nian mós toba la dukur tanba akompaña prosesu kazal Timor-oan ne’ebé tuir informasaun sei hala’o julgamentu iha semana oin.

Read 1327 times
Rate this item
(0 votes)
MidAd1