PR Taur Laiha Alternativa Ba LPV

By Joana da Cruz Janeiru 31, 2017 1158
Prezidente Republika Timor-Leste Taur Matan Ruak Prezidente Republika Timor-Leste Taur Matan Ruak

DILI: Alterasaun Lei Pensaun Vitalisia (LPV) ne’ebé Parlamentu Nasionál haruka ona ba Prezidente Repúblika, Taur Matan Ruak hodi promulga fó dilema boot.

Atu promulga mós la di’ak tanba persentajen iha alterasaun ne’e sei boot nafatin. La promulga mós la di'ak, tanba kuandu la promulga lei anteriór válidu nafatin ho subsídiu persentajen 100% no regalia oi-oin.

Ne’e duni, Deputi Diretór Luta Hamutuk (LH), Laurentino Alves, hakarak ka lakohi Prezidente Taur Matan Ruak tenke halo duni promulgasaun, maski Lei ne’e rasik nafatin fó benefísiu ba iha grupu balun de'it.

Tuir Luta Hamutuk, alterasaun ne'ebé halo husi Parlamentu Nasionál laiha mudansa, tanba nafatin diskriminasaun no fó benefísiu ba iha grupu balun de’it.

Prezidente iha direitu veta, maibé dala ida de’it. Tanba ne’e, hakarak ka lakohi Prezidente Taur tenke promulga Lei ne’e maski la satisfás ho alterasaun ba iha lei ne’e.

Antes ne’e, Prezidente Repúblika, Taur Matan Ruak hateten, nia pozisaun ba LPV mak hamoos totál, maibé Parlamentu Nasionál (PN) dehan labele hamoos.

“Lei Pensaun Vitalisia ha’u dehan ko'a hotu tiha, Parlamentu Nasionál dehan labele, ne’ebé aban-bairua mak ita haree took,” dehan PR Taur.

Nu'udar Xefe Estadu, Taur dehan, nia hakarak veta, maibé kuandu veta tuir lei tenke ba tribunál. Tanba Prezidente Repúblika labele veta dala rua.

“Ba oin, ba kotuk ha’u kona hotu, bele-bele ema lori ha’u ba tribunál,” dehan PR Taur.

Ba pozisaun atu veta ka promulga, PR Taur la fó resposta klaru, nia só dehan de’it katak aban-bainrua mak haree.  

Rate this item
(0 votes)

Independente Digital TV