Observadór husi Governu, Joaquim da Costa Freitas hatete, ezistensia Caucus durante 2010 to’o 2016 konsege hatudu progresu ne’ebé di’ak.

Tanba, nia dehan, iha feto barak mak hahú kompete iha vida politika nune’e mós vida lideransa.

Nia fó ezemplu ba eleisaun suku nian ne’ebé feto barak konsege kandidata an ba lideransa Suku, Aldeia no Delegada.

Iha Kinta (26/01), Caucus realiza seminariu ho topiku ‘Promove Transparensia Públika no Partisipasaun Parseiru’, liu husi Lansamentu Relatoriu Final ba Avaliasaun Externa 2010-2016 serbisu ezistensia CAUCUS nian.

Iha avaliasaun ne’e ko’alia liu kona-ba progresu no lakunas sira ne’ebé mak instituisaun ne’e hasoru durante tinan hirak ne’e nia laran.

“Nia objetivu mak atu deskobre progresu no lakunas saida de’it mak fundasaun Caucus hasoru durante ne’e,” deklara Diretora Caucus, Paula Cortereal ba jornalista sira, iha Salaun Enkontru Hotel Vila Verde, Dili.

Nia dehan importante liu husi avaliasaun externa ne’e mak benefisiariu no parseiru sira-nia observasaun ba ezistensia Caucus.

Ba tinan ne’e, Diretora ne’e hatete, Caucus sei esforsu an liu husi nia formasaun sira atu lori feto sira ba kompete iha vida lideransa no ukun-nain.

Iha fatin hanesan, Xefe Suku Kampung Alor, Maria Alcina rekoñese ho ezistensia Caucus.

Nia dehan, ho formasaun husi Caucus mak dudu nia atu ba kompete iha eleisaun suku no ikus mai nia hetan eleitu hodi sai Xefe Suku Kampung Alor.