Domingu, 26 Maiu 2019 | Login
Deputadu Bankada PLP, Sabino Soares ‘Guntur’.  FOTO: dok Deputadu Bankada PLP, Sabino Soares ‘Guntur’. FOTO: dok

PLP: Membru Governu Balun Laiha Kapasidade, Presiza Remodela Featured

DILI: Partidu Libertasaun Popular (PLP) ne’ebé hola parte iha VIII Governu Konstitusional husu atu halo remodelasaun tanba konsidera membru governu balun laiha kapasidade.

Kestaun ne’e hato’o husi Deputadu Bankada PLP, Sabino Soares ‘Guntur’ relasiona ho preokupasaun sosiadade sivil ne’ebé konsidera durante fulan ualu (8) nia laran governu ne’ebé lidera husi Primeiru Ministru Taur Matan Ruak seidauk halo buat foun ida.

Deputadu Guntur hatete, ezistensia VIII Governu Konstitusionál atu tama ona ba tinan ida, tan ne’e PM Taur presiza halo avaliasaun hodi hatene membru governu sira-nia dezempeñu serbisu hahú husi ezekusaun Orsamentu Jerál Estadu (OJE) 2018 no OJE 2019.

“Ha’u-nia observasaun katak membru governu balun laiha kapasidade kontrolu no inkapasidade ba ezekusaun tanba ne’e presiza halo avaliasaun tinan ida nian atu bele halo remodelasaun,” deklara Guntur ba jornalista sira iha plenaria PN, Segunda (11/03).

Avaliasaun ne’e, nia hatete, atu atu hatene membru governu sira-nia susesu no failansu no bele orienta ba iha remodelasaun.

Remodelasaun ne’e rasik, Guntur hatutan, bele loke mós posibilidade atu kompleta ona membru governu ne’ebé seidauk kompletu.

“Hahú husi 2018 mai to’o ohin loron prosesu hotu la’o tiha ona, atu ezekuta osan ka la ezekuta ne’e buat hotu la’o ona tanba ne’e tenke avalia dezempeñu serbisu,” deklara nia.

Molok ne’e, Diretór Ezekutivu Forum Organizasaun Naun Governamentál Timor Leste (FONGTIL), Daniel dos Santos Carmon hatete, durante fulan 8 ezistensia VIII Governu seidauk hatudu buat foun ruma ne’ebé mai husi inisiativa membru governu nian rasik.

Nia dehan, iha fatin-fatin komunidade sira kontinua halerik ba bee-moos, merenda eskolár paradu, no seluk tan.

“Haree husi aspeitu hirak ne’e, susar atu fó aseitasaun ba prestasaun serbisu governu nian,”.

“Membru governu balun laiha kapasidade, balun ba ministru no sekretariu estadu hanesan ba halo kelinci percobaan,” dehan diretór ezekutivu FONGTIL ne’e.

Atu fó solusaun ba asuntu ne’e, PM mak iha kompetensia hodi buka hatene didi’ak planu ministériu sira no halo supervizaun ida ne’ebé rigor hodi fó xamada ba membru governu sira.

Bainhira governante balun laiha kapasidade iha prosesu ezekusaun OJE, Daniel dehan, PM tenke halo avaliasaun hodi subtitui ho ema ne’ebé iha kapasidade atu bele apoiu PM nia serbisu.

Iha fatin hanesan, Observador Politika husi Universidade Nasional Timor Lorosa’e (UNTL) Camilio Ximenes konsidera hanoin husi sosiedade sivil importante no hanesan alarma ba governu atu halo serbisu ho di’ak.

Kona-ba remodelasaun, observadór ne’e hatete, PM mak iha kompetensia no tenke hetan apoiu husi partidu politiku ne’ebé hamahan aan iha AMP.

“Ha’u seidauk iha indikador ida ne’ebé klaru atu dehan membru governu nia dezempeñu serbisu ne’e di’ak ona ka la’e,” dehan nia.

“Osan de’it laiha atu membru governu sira ezekuta. Foin lalais aprova duni osan (OJE) 2018 nian, maibé ne’e ba selu dividas governu nian, oinsa mak indika ema-nia dezempeñu serbisu ne’e?”.

Tuir nia, daudauk ne’e seidauk bele halo avaliasaun ba remodelasaun, presiza atu fó espasu ba membru governu sira hodi ezekuta OJE to’o tinan ida hafoin bele avalia.

“(Husi ne’e mak foin) bele hatene ministru A ka B nia dezempeñu serbisu,” deklara nia.

Read 1704 times
Rate this item
(0 votes)