Ministru Defeza no Interiór Interinu (MDI), Filomeno de Jesus Paixão dehan, tuir lei mandatu Komandante no Segundu Komdante Jerál PNTL asume tinan haat, nune’e sei termina mandatu iha 27 Marsu tinan ne’e.

Nia dehan, daudaun ne’e Konsellu Superiór PNTL sei diskute hela, bainhira prosesu diskusaun ne’e termina mak entrega ba Governu hodi diskute iha Konsellu Ministru atu deside Komandante Jerál no Segundu komandante jerál PNTL.

“ Sé mak atu kandidatu ha’u seidauk bele fó sai  iha públiku, hein desizaun Konsellu Ministru,” dehan Meno Paixão, iha edífisiu Ministériu Finansas, horisehik.

Molok ne’e, Meno Paixão dehan iha instituisaun PNTL laran iha diviza koronél barak tebes, ne’ebé iha kapasidade atu lidera instituisaun seguransa hodi orienta komandante munisípiu ho komandante unidade sira atu fó garante estabilidade ba povu no nasaun.