Maski nune’e, modelu formasaun governu saida de’it mak atu mosu, Presidente CPN-CNRT, Dionisio Babo hatete, CNRT sei hakuak partido hotu-hotu atu tenki servisu hamutuk hodi hamoris Timor-Leste.

Maibé tuir Ministru STATAL ne’e katak, julgamentu ne’e, povu mak deside atu fiar se mak atu ukun. CNRT optimista tebes atu manan iha eleisaun ne’e.

“Tanba kualker forma governu ne’e desizaun ikus husi povu. CNRT sei hatudu nafatin dalan no maturidade politika ba partido hotu-hotu katak ita tenki servisu hamutuk atu hamoris  ita rain,” dehan Babo, hafoin fó nia votu iha sentru votasaun Eskola primaria Filial, Farol , Dili sabdu ohin.

Tuir nia observasaun iha prosesu demokrasia ne’e, katak kampaña politiku husi eleisaun presidensiál too iha kampaña parlamentar no eleisaun ohin ne’e hatudu tiha ona katak povu antusimu makás ba prosesu demokrasia ne’e. Ne prova ba mundu katak demokrasia maduru liu sira liu paizes sira iha asean.

“Ha’u kontente tebes, ohin ha’u mai iha sentru votasaun, ha’u haree povu hotu-hotu mai ezerse sira nia direitu,”dehan nia.