Alkatiri: Likisá Poténsia Peska no Turizmu Featured

By Tome Amado Abril 24, 2018 1014
Alkatiri kampanha iha Likisa Alkatiri kampanha iha Likisa

LIKISÁ : Sekretáriu Jerál partidu FRETILIN, Mari Alkatiri hateten, Likisá sai fatin poténsia boot ba peska no mós turizmu. Kuandu poténsia rua ne'e aselera di'ak liután munisípiu ne’e sei sai mataka.

Durante ne'e governu la implementa ninia Planu Estratéjiku Dezenvolvimentu Nasionál ( PEDN). Tanba ne'e, poténsia boot iha área peska nunka dezenvolve ho di'ak.

Lia hirak ne’e hato'o husi Sekjer FRETILIN, Mari Alkatiri, iha kampaña komísiu, iha Likisá, horisehik.

Nia hateten, FRETILIN promete ba povu Likisá, kuandu kaer ukun sei tau prioridade boot ba área poténsia sira inklui peska. Tan ne'e, labele haluha vota ba FRETILIN.

Alkatiri mós realsa liután, alende peska, Likisá mós iha fatin turizmu ne'ebé koñesidu hanesan edifísiu administrasaun antiga. Fatin ne'e, kuandu dezenvolve ho di'ak sei lori benefísiu boot ba povu.

Maibé, antes atu hadi'a fatin poténsia sira ne'e tenke hadi'a uluk estrada, eletrisidade, bee moos no uma guest house. Atu nune'e, bele atrai liután turista nasionál no internasionál sira.

Tanba ne'e, vota ba FRETILIN tanba partidu ne’e de'it maka sei garante dezenvolvimentu ba povu Likisá iha tinan lima nia laran. FRETILIN la mai halo promesa maibé ne'e realidade.

Rate this item
(0 votes)

Independente Digital TV