Portavós AMP dehan, AMP iha lideransa ne’ebé forte, bainhira forma Governu ne’e forte liután atu hamutuk ho povu Timor-Leste hodi hodi haforsa dezenvolvimentu.
“La'ós agora mak la’o ho ita boot sira, maibé la’o ho ita boot sira iha tinan barak nia laran no hatudu iha pratika katak ami mós bele ukun Timor”, dehan Taur iha mini kampaña, iha Remexio-Aileu, Sábadu (22/4).
Nia dehan, Laiha Lider ida mak hanesan Xanana Gusmão ho Taur Matan Ruak, ne’ebé durante ne’e hamutuk ho povu atu hasai povu husi kiak nia laran, nune’e defende dignidade povu Timor no tane uma lisan atu identidade timoroan labele lakon.
Taur hatutan, importante liu mak dezenvolvimentu ba nasaun, lori dezenvolvimentu ne'ebé seidauk iha hodi implementa nune’e lori dezenvolvimentu ne’ebé seidauk hotu hodi kontinua hadi’ak liután.
Nune’e, nia haktuir, públiku balun preokupa katak AMP laiha programa nune’e konta de'it istória, maibé AMP nia programa iha parte rua mak programa dezenvolvimentu nasionál no prioridade ba kada munisípiu ne’ebé haree ba kada potensiál munisípiu ida-idak.
Taur dehan, eleisaun agora labele falta hodi vota ba AMP, nune’e Governu no parlamentu forte no dezenvolvimentu sai buras liután iha Timor-Leste. Tanba, lider rezisténsia na’in rua ne’e iha ona kompromisu no prontu ona hadi'ak liután povu nia moris ho di'ak.
