Tersa, 10 Dezembru 2019 | Login
Ilustrasaun: Dollar (OJE) Ilustrasaun: Dollar (OJE)

Sosiedade Sivíl Konsidera Asesór Barak Hatodan OJE Featured

DILI: Sosiedade Sivíl liu-husi Diretór Asosiasaun HAK Manuel Monteiro Konsidera governu kontrata asesór barak ho númeru rihun ida resin sei hatodan  Orsamentu Jerál Estadu (OJE).

“Governu kontrata asesór 1.014, ida ne'e sei implika ba gastus. Osan barak mak sei gasta hotu hodi selu asesór sira nia saláriu. Entaun estadu tenke gasta dobru. Selu funsionáriu públiku no asesór sira,” dehan Manuel Monteiro ba jornal INDEPEDENTE via  Whatsapp Kinta (14/11).

Nia konsidera situasaun ne'e  indika  frakeza ukun, tanba labele organiza rekursu umanu sira ne'ebé  iha.

Iha nia observasaun hatudu katak,  asesór sira barak hanesan nee bele mós lá hatudu kualidade servisu, nune'e sei labele atinje vizaun Planu Estratéjiku Dezenvolvimentu Nasionál (PEDN).

"Oras nee daudaun povu barak mak halerik ba bee moos, estrada no seluk tan,  maibé tanba sá mak governu kontrata asesor barak hanesan nee, sira halo kontratu ho asesor sira nee husi neebé, se estranjeiru hatudu governu ida inkapasidade. Se asesor nasionál hatudu fahe paun ba malu tanba sira halo servisu makaas durante kampaña eleitoral", dehan nia.

Antes ne'ebé, Prezidente komisaun D deputada Virgína Ana Belo hateten, komisaun D simu ona lista asesór nasionál no internasionál husi ministériu finansa.

“Ami simu ona lista asesór boot oituan husi Ministériu Finansas kuaze 1.014 pesoas. Ami nia pensamentu ne'e lista asesór ne'ebé barak hanesan ne'e di'ak liu troka funsionáriu públiku lalika servisu hotu, husik asesór sira mesak mak servisu deit,” dehan deputada Virgína iha Parlamentu Nasionál Kuarta (13/11).

Nia dehan, númeru asesór ne'ebé boot, sira sei ko'alia hotu iha nivel parlamentu ho governu hodi haree  ba asuntu sira hanesan nee atu justifika.

“Ita bele komprende tanba iha nasaun barak mós uza asesor, hau fó  ezemplu iha nasaun avansadu sira hanesan  Dubay. Ema nia funsionariu publiku pursentu 50 ema rai nain pursentu 50, maibé sira iha osan hodi selu asesór sira no sira nia ema nee barak  liu kompara ho ema husi rai liur,” dehan nia.

Nia haktuir iha diferensia asesór nasionál no internasionál entermus saláriu ho montante neebe  la hanesan.

“Ita nia asesór nasionál nee fó másimu $ 5.000 too $7.000. Maibé asesór internasionál balun $10.000 too $20.000, nee barak tebes. Espera katak governu bele haree ona asuntu sira nee,”dehan nia.

Opozisaun Husu Redús Númeru Asesór

Bankada opozisaun iha parlamentu nasionál (PN) husu Primeiru Ministru (PM) Taur Matan Ruak atu Redús númeru asesor nasionál no internsionál.

Deputadu  Fretilin Fabião de Oliveira hateten, asesor sira tenke redus oituan,tenke iha asesor prinisipal no asesor tekniku deit.

“Hau fó ezemplu iha Ministeriu Obras Públiku (MOP) iha 28 asesór.Tanba sa mak presija asesór barak hanesan nee, maibé atu halo servisu saida ezekuasaun  deit iha tinan nee foin mak atinje 60 pursente liu”dehan nia,iha PN horisehik.

Iha fatin hanesan, deputadu Adriano do Nascimento hateten, nia mós hakfodak ho deputadu husi AMP halo kritika makaas ba numeru asesór ho numeru bootliu iha oitavu governu.

Tanba ne'e nia mós husu ba líder masimu husi partidu koligasaun tolu neebe kaer governu atu haree asuntu née ho sériu.

Antes nee mós Primeiru Ministru Taur Matan Ruak deklara katak Timor Leste seidauk bele hamriik mesak bainhira  laiha apoiu husi asesor interansionál.

Read 783 times
Rate this item
(0 votes)