Ne’e duni, bainhira iha remodelasaun iha ministru na’in haat maka hetan rekomendasaun atu bele troka.

Tuir sosiedade sivíl setór haat maka la la’o, tanba ne’e bainhira governu iha hanoin atu halo mudansa presiza hasai ministru sira ne’ebé tutela ba área hirak ne’e.

“Kuaze ita haree setór haat maka la la’o agrikultura, edukasaun, infraestrutura báziku, no saúde”, dehan dehan Diretór Ezekutivu FONGTIL, Daniel Santos do Carmo, iha kna’ar fatin, Kaikoli, horisehik.

Maski nune’e, remodelasaun kompeténsia partidu koligasaun AMP nian, maibé preokupasaun maka ne’e atu remodela ho objetividade lori prosesu dezenvolvimentu mais efetivu.

Tuir nia, maski troka ministru maibé la halo investimentu iha setór agrikultura mós problema hanesan kontinua akontese, hanesan mós iha setór tolu sira seluk.

Sosiedade sivíl haree katak, OJE 2019 relatóriu governu hatudu ministériu balun ezekuta ona husi 75 – 90%, maibé alokasaun ne’e ba saláriu no vensimentu hanesan manutensaun, enkontru, semináriu, no viajen estranjeiru sira ne’e.

Maibé, ida investimentu iha kapitál umanu, kapitál dezenvolvimentu no kapitál menór la haree iha orsamentu 2019. Tanba projetu fízika balun foin hahú iha faze mobilizasaun materiál.

Antes ne’e, partidu koligasaun hasai ona rezolusaun atu halo remodelasaun ba membru governu sira, maibé seidauk iha serteza tanba lider másimu AMP, Kay Rala Xanana Gusmão seidauk foti desizaun.