Lider Sira Tenke Tau Aas Interese Nasionál Featured

By Janeiru 15, 2019 1755
Bispu Dioseze Dili, Don Virgílio do Carmo da Silva Bispu Dioseze Dili, Don Virgílio do Carmo da Silva

DILI:Igreja Katólika liu husi Bispu Dioseze Dili, Don Virgílio do Carmo da Silva hateten, lider sira tenke serbi povu iha nasaun ne'e ho dignidade, tanba destinu povu nian iha ukun na'in sira nia liman.

Timor nasaun ne'ebé ki'ik maibé ninia istória boot tanba Maromak kontinua akompaña iha momentu susar no tempu ksolok hanesan identidade ba povu iha país nian.

Nune'e, Bispu kontinua husu ba povu Timor tomak kontinua hasa'e orasaun ba eroi no matebian sira hodi fó sasin ba moris povu iha nasaun ne'e nian.

"Ita kontinua inspira povu sira liuliu ba lider sira katak kaer ukun signifika serbí hodi tane aas interese ho dignidade povu ho nasaun nian", dehan nia, iha omilia bainhira prezide misa requem ba Saudozu Jaime Camacho Amaral, iha Katedrál Vila-Verde, Sesta (11/1).

Bispu Dili kontinua korajen ba ukun na'in ho povu iha nasaun ne'e tenke sakrifika aan hodi serbisu, tanba nasaun nia di'ak hodi tane interese nasaun nian, hodi lori dezenvolvimentu ne'ebé progresu ba nasaun ne'e.

Nia dehan, povu iha nasaun ne'e hakarak moris iha dame nia laran, ne'e duni ukun na'in sira tenke se tilun no rona mós povu nia halerik.

Maibé servisu hotu kuandu la'o ho susesu tenke hato'o orasaun mós ba Na’i Maromak ho matebian sira hodi fó naroman ba povu sira iha nasaun ne'e.

Rate this item
(0 votes)

Independente Digital TV