Nia esplika, mediadór ne’e la'ós Xanana ho Lú Olo maka tuku malu ne’ebé ba halo mediasaun hodi fó dame sira, maibé ne’e kona-ba lei.

“Mediadór para haluha tiha lei, tau tiha lei iha gaveta laran depois sira diálogu ne’e oin seluk. Maibé sira tuur hamutuk maka lei dehan hanesan tenke halo tuir lei hanesan ne’e sa'e ita la halo tuir mós sala”, dehan Lere, iha Palasiu Prezidensiál, Bairru-Pité, Sesta (11/1).

Tuir nia, Igreja Katólika bele sai mediadór mós la fó efeitu. Importante sira na’in hira ne’e tenke iha konxiénsia morál.

Nia hatutan, sira ne'ebá ne’e hotu-hotu interese nasionál duni hotu-hotu preokupa dezenvolvimentu moris di’ak povu nian, maibé buat hotu-hotu lei. Prezidente Repúblika sei veta ka lae mós tuir lei.

ne’e duni, husu ba José Ramos Horta, Xanana Gusmão, Mari Alkatiri, Taur Matan Ruak no Francisco Guterres ‘Lú Olo’, labele haluha nasaun ne’ebé sira liberta ona no labele husik atu povu ne’e terus tan ba dala ida.

Problema ne’ebé agora mosu ne’e loloos akontese iha tinan 50 oin mai, tanba ema sira ne’e la apar ona ho istória Timor nian ne’ebé haree hanesan mehi de’it.

“Ha’u la fiar katak maun Xanana haluha tiha rihun ba rihun ne’ebé fakar sira nia raan no balun ohin loron rate laiha. Hanesan mós maun Lú Olo, maun Taur sira haree ho matan dala ruma balun mate sira nia liman laran”, dehan Lere.