Konsellu Estadu nu’udar órgaun konsulta polítiku ba Prezidente Repúblika hodi rona opiniaun sira relasiona ho asuntu nasionál molok foti desizaun. Prezidente Repúblika sei prezide Konsellu Estadu ho pontu úniku Orsamentu Jerál Estadu 2019.
Membru Konsellu Estadu na’in-tolu, Eduardo de Deus Barreto ‘Dusae’, José Cornélio Guterres no Arcângelo de Jesus Gouveia Leite, ne’ebé eleitu husi Parlamentu Nasionál molok reuniaun hahú sei simu termu pose.
Kompozisaun membru Konsellu Estadu mak Prezidente Repúblika, Francisco Guterres Lú Olo, eis Prezidente Repúblika Kay rala Xanana Gusmão, eis-Prezidente Repúblika José Ramos Horta, Primeiru Ministru Taur Matan Ruak, Prezidente Parlamentu Nasionál Arão Noé de Jesus, Eduardo de Deus Barreto ‘Dusae’, Aurora Ximenes, José Cornélio Guterres, Arcângelo de Jesus Gouveia Leite, José dos Santos ‘Naimori' Bucar ne’ebé eleitu husi Parlamentu Nasionál no Óscar Lima, Faustino Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé Prezidente Repúblika foti.
Prezidente Repúblika simu Lei Orsamentu Jerál Estadu 2019 ho montante billaun $2.1 husi Parlamentu Nasionál iha 24 Dezembru 2018. Nune’e, sei iha loron 30 atu estuda molok foti desizaun.
Molok hala’o reuniaun Konsellu Estadu, Prezidente Repúblika rona ona entidade oioin nia hanoin kona-ba OJE husi Konsellu Konsultivu Fundu Petrolíferu (KKFP), organizasaun sosiedade sivíl, jurista, akadémiku, konfisaun relijioza, Camara Comercio e Industria Timor-Leste (CCI-TL), Banku Central Timor-Leste (BCTL), hahú husi 7-10 Janeiru 2019.
