Atu halo konkorrénsia foun hodi hili kompañia fornesidor sira presiza tempu to’o fulan neen, tanba ne’e atu garante ahi lakan nafatin sei kontinua estende kontratu tuan.

Ministru obras públika (MOP), Salvador Pires hateten, enkontru Konsellu Ministru hodi aprezenta kestaun kona-ba kontratu no emenda ba kompañia fornesidor kombustivel sentrál elétrika Hera no Betanu.

Nune'e, kompañia ETO no Sacom ninia kontratu sei termina fulan Marsu 2019, tanba relasiona impase polítika. Kompañia ETO fornese liutiha mina tuir kontratu ne'ebé halo ba governu.

“Ami ko'alia mós oinsá atu estende tan sira nia kontratu, tanba atu loke konkursu foun ita tenke kabe ba orsamentu," dehan Salvador, iha Palásiu Governu, horisehik.

Nune'e, nia dehan, konkursu foun ne'ebé posivel halo ho kategoria padraun internasionál ho tipu Internasional Competition Building (ICB) tender presiza ho durasaun fulan neen hodi hetan fornesidor foun.

Governante ne'e dehan, MOP aprezenta pedidu ne'e iha Konsellu Ministru hodi estende mandatu to'o loron 19 Setembru tinan ne'e.

Nune'e, fó oportunidade ba governu halo prosesu preparasaun ba tender kompañia sira hodi fornese kombustivel ba sentrál elétrika Hera- Betano iha futuru.

Salvador dehan, kalkulasaun husi ekipa tékniku husi EDTL, bainhira governu estende kontratu ETO too fulan Setembru mak kompañia ne'e sei fornese mina ho litru tokon 75.