“Média hakerek notísia bazeia ba faktu maibé ikus ita foti desizaun atu hapara kliente ne’e atu hatudu katak la gentelment hodi hatudu ninia profisionalizmu”, dehan nia, iha servisu fatin, Kaikoli, horisehik.

Saida maka média sira publika relasiona ho ministru ne’e la'ós tanba ninia pesoál maibé tanba kargu públiku ne’ebé ema ne’e lori.

Nia dehan, bainhira ministru balun komete krime ka sala ruma, papél média iha kompeténsia no devér morál atu hakerek notísia loron-loron.

Marik média hatudu informasaun hasai iha públiku la eduka komunidade sira ka lansa informasaun falsu maka bele hakotu kliente, la'ós tanba problema partikulár nian mós lori hotu ba servisu fatin.

Tanba ne’e, nia dehan, problema entre média ho instituisaun governu nian tenke tau ketak iha fatin hodi hatuur knaar pozisaun nu’udar ministru.

SEKOMS Laiha Informasaun Liña Ministériu Hapara Kontratu ho Média

Iha fatin ketak, Sekretáriu Estadu Komunikasaun Sosiál (SEKomS) to’o oras ne’e seidauk simu informasaun kona-ba liña ministériu balun ne’ebé hapara kontratu ho média imprime balun durante ninia mandatu.

Sekretáriu Estadu, Juvinal Mericio Akara dos Reis dehan, Governu liu husi SEKomS kontinua iha kometimentu hodi koopera média nasionál sira desimina informasaun ba instituisaun Estadu sira nune’e haburas demokrasia iha rai laran.

“Ha’u seidauk simu informasaun ne’e, formalmente ha’u rasik seidauk simu. Karik ha’u simu ami membru Governu sira sempre ko’alia ba malu”, dehan nia, iha Palásiu Governu, horisehik.

To’o oras ne’e seidauk simu karta ofisiál ka informasaun formál kona-ba preokupasaun ne’ebé média lokál sira enfrenta bainhira halo kontratu hodi desimina informasaun ba liña ministériu sira.

Nune’e, nia dehan, planu SEKomS nian kontinua buka meiu hodi haruka karta sirkulasaun ba instituisaun Estadu sira, nune’e koordena ho média lokál divulga informasaun iha instituisaun Estadu nune’e promove demokrasia.

Akara haktuir, iha mandatu VIII Governu hakarak lori governasaun ba sidadaun liu husi tranzmite asaun governasaun atu sidadaun sira akompaña liu husi informasaun média sira, nune’e sidadaun sira akompaña.

Tanba ne’e, iha kestaun tékniku balun ne’ebé média sira ladún satisfás haruka karta ofisial ba SEKomS hodi bele rezolve ho ulun malirin, nune’e divulga informasaun ho armonia haburas liután demokrasia no dezenvolvimentu iha país ne’e.