Deputadu Bankada Partidu Demokrátiku (PD), Mariano ‘Assanami’ Sabino hateten, dada kadoras mai Timor ne’e polítika di'ak tebes atu bele diversifika ekonomia iha rai laran.

Gazodutu ne’e mai iha indústria refinaria ne’e la'ós atu produs de’it mina no gás, maibé sei hamosu indústria petrokímika hodi bele hamosu produtu hanesan adubu, medisina no seluk tan.

Haree husi prosesu hirak ne’e sei fó reseita mai Timor atu uza ba dezenvolvimentu, entaun prosesu hirak ne’e tama hotu iha PEDN ne’ebé ohin loron sai hanesan mata dalan ba dezenvolvimentu.

Entaun, polítika ne’e sai ona interese nasionál, individu, grupu partidária ka grupu empreza ida labele politiza hodi minimiza malu ba asuntu interese nasionál ne’e.

“Buat hotu-hotu ne’ebé ita halo sempre iha risku, tanba ne’e mai ita hamutuk hodi responsabiliza risku husi investimentu ne’e labele ida hamriik fó merese ba ida seluk bainhira risku ruma mosu”, dehan nia, iha Uma Fukun PN, horisehik.

Governu halo ona estudu viabilidade hodi tetu vantajen no dezvantajen iha futuru ne’e klaru hotu ona, maibé problema mak diferensa ideia lakohi simu malu ne’e mak sai barreira ba prosesu ne’e.

Ne’e duni, insiste beibeik diálogu nasionál ne’e tanba asuntu interese nasionál presiza aman sira hamutuk sira kuandu unidu sai hanesan aliserse ida ba jerasaun foun sira hodi kontribui ideia hotu-hotu, atu bele suporta planu ne’e ba oin ho di'ak liu tan.

Iha fatin hanesan, Vise-Prezidente Bankada FRETILIN, Francisco Miranda Branco hateten, atu dada kadoras mai iha Timor ne’e ema hotu iha interese laiha ema ida atu kontra polítika ne’e.

“Dada kadoras mai ne’e ita hotu hakarak, maibé ita mak laiha vontade atu tuur hamutuk”, dehan nia.

Durante ne’e kestiona prosesu tomak atu dada kadoras mai ne’e la'ós kontra atu dada kadoras mai Timor, tanba riku-soin ne’e povu nian entaun povu iha direitu absoluta atu goza rekursu rasik.

Iha konstituisaun artigu 70 ko'alia kona-ba partidu sira no direitu opozisaun nian iha alínea 2 hateten iha rekoñesimentu ba partidu polítiku sira nia direitu atu simu informasaun, regulár no direitu kona-ba lala’ok asuntu prinsipál interese nasaun nian, maibé ne’e durante la akontese.