Antes ne’e governu aprezenta kandidatura na’in rua, Sérgio Hornai no Adérito Tilman, maibé atu tama ba eleisaun kandidatu ne’ebé temi ikus retira-aan hodi fila hikas ba hala’o servisu iha prokuradoria.
Nune’e, eleisaun avansa ho pakote uniku ne’ebé opozisaun no bankada governu konkorda malu kontinua ba votasaun ho deputadu prezente 57 ne’ebé prienxe ona kuorum dois tersus, tuir lei haruka.
Maski hetan ona konkordánsia hodi hili Komisáriu KAK, maibé Vise-Prezidente Bankada FRETILIN, Francisco Miranda Branco, ezije ba meza Parlamentu Nasionál (PN) atu hatudu vontade hodi ajenda diskusaun Lei Anti Korrupsaun (LAK) ne’ebé antes ne’e FRETILIN no PD hatama ona projetu lei ne’e.
Nia hateten, eleisaun ba Komisáriu KAK ne’e la'ós importante liu, maibé instrumentu legál hanesan LAK mak sai prioridade hodi fó kompeténsia ba KAK, Ministériu Públiku (MP) no Polisia Nasionál Timor-Leste (PNTL) no Polisia Sientífiku Investigasaun Kriminál (PSIK) atu haforsa sira-nia servisu.
Tinan sanulu ona LAK ne’e tau de’it iha gaveta la diskute, iha tinan ne’e presiza tebes atu diskute lalais atu bele fó kompeténsia absoluta ba KAK hodi hala’o funsaun.
“Ohin loron seidauk bele diskute no aprova LAK ne’e tanba irikesimentu ilísitu ‘penbuktian terbalik’ ne’e mak sai hanesan fundamentu hodi sira lakohi diskute ne’e”, dehan nia, iha Uma Fukun PN, horisehik.
Kódigu Penál ne’ebé durante ne’e autoridade justisa sira uza hodi halo investigasaun presiza halo ona atualizasaun, tanba dezenvolvimentu la’o presiza lei sira mós la’o tuir evolusaun.
Iha fatin hanesan, Vise-Prezidente PN, Maria Angelina Sarmento hateten, problema Komisáriu KAK ne’ebé durante ne’e sai polémika rezolvidu ona, maibé seidauk iha serteza bainhira loos mak atu fó pose.
Nia hateten, Lei Anti Korrupsaun ne’e sai hanesan prioridade ba kinta lejizlatura tanba ne’e sei fó prioridade.
Durante ne’e, LAK rasik seidauk bele halo diskusaun tanba iha atividade barak Parlamentu Nasionál atende liu-liu ba Orsamentu Jerál Estadu (OJE). Maibé fiar katak tinan ne’e bele diskute no aprova.
