Haree polítika ne’e, Deputadu Bankada FRETILIN, Antonino Bianco hateten, atu halo emprestimu hodi sosa asaun ne’e hanesan opsaun ne’ebé aprezenta oinsá atu hetan osan hodi halo pagamentu ba kontratu ne’ebé antes ne’e halo ona ho kompañia sira.

Atu halo emprestimu ne’e kompeténsia governu nian, maibé tenke liu husi regra sira ne’ebé iha atu osan ne’ebé empresta tenke iha sustentabilidade.

Iha tinan hirak liu ba governu halo empresitimu hodi halo konstrusaun estrada nasionál sira ne’ebé liga ba munisípiu, maibé ne’e tuir regra emprestimu nian ne’ebé implementa husi banku no Estadu Timor nian.

Regra emprestimu ne’e iha ona, tanba ne’e banku sira mós sei husu garantia saida hodi selu hikas, liu husi OJE ka liu husi fundu petrolíferu ne’e hanesan garantia ida ba banku.

“Kualkér emprestimu ne’e Parlamentu Nasionál tenke hatene, tanba ne’e ba interese nasionál nian entaun ita tenke envolve mós órgaun hotu-hotu”, dehan nia, iha Uma Fukun PN, horisehik.

Nia hatutan, governu bele ba halo emprestimu tanba iha kompeténsia, maibé tenke informa mai iha PN atu bele hatene empresta osan hira? Iha banku ne’ebé? tinan hira mak selu hotu? no Funan Hira?

Hanesan reprezentante povu tenke hatene tanba konstituisaun iha Artigu 70 alínea 2 hateten momoos katak partidu polítiku sira iha Parlamentu Nasionál iha direitu hetan informasaun regulár kona-ba interese nasionál.