Tuir PM Taur, Prezidente Repúblika Francisco Guterres Lu Olo iha prazu atu estuda hodi promulga ka veta ba OJE 2019. Tan ne’e nia lakohi atu sig ka halo espekulasaun ba desizaun ne’ebé PR Lu Olo sei foti.

“Ha’u observador ka hanesan ne’e karik ha’u bele analiza ida kona-ba ida ne’e, agora problema ha’u la’os observador maibé ha’u Primeiru Ministru entaun hein buat ne’ebé iha tanba Prezidente Repúblika iha prazu ida, ita hein,” dehan Taur ba jornalista sira hafoin enkontru semanál ho PR Lu Olo iha Palasiu Prezidensial Bairu Pite, Kinta (17/1/).

PM Taur dehan, uluk nia mós Prezidente Republika tan ne’e nia hatene saida mak Prezidente Republika dadaun ne’e atu halo.

“Ha’u mós uluk Prezidente Repúblika, iha ne’eba ha’u hatene, Primeiru Ministru mai se ha’u hakarak ko’alia entaun ha’u ko’alia, se la’e, lei dehan prazu to’o hanesan ne’e, entaun kumpri prazu,” hatete nia.

Tuir Xefe Governu ne’e Prezidente Repúblika iha prazu loron 30, to’o loron 24 Janeiru oin mai, hodi estuda OJE 2019.

“Ne’ebé hein de’it. Prezidente Repúblika atu toma desizaun bainhira iha kompetensia ninia rasik,” dehan nia.

Atu makina estadu bele la’o nafatin, PM Taur dehan, iha fulan Janeiru ne’e governu sei uza orsamentu doudesimu hodi selu salariu, bens no servisu, transferensia, hodi hein to’o PR Lu Olo foti desizaun.

Kona-ba atu sosa asaun ChonochoPhilip no Shell, PM Taur dehan, tenke hein OJE 2019 tanba osan ba sosa asaun ne’e preve iha OJE 2019.

“Osan ne’ebé ita atu sosa asaun ne’e iha tiha ona OJE 2019, sei iha Prezidente Repúblika nia liman, nia promulga ka veta, tanba ne’e maka ita seidauk ko’alia kona-ba ida ne’e,” dehan Taur.