Joven Voluntária, Noviana Eva do Carmo hatete, sente kontente ho Festivál Ekulturiz ba tinan 2025 ne'ebé mak organiza husi Asosiasaun ArteEmpreender iha Timor-Leste ne'ebé mak envolve joven voluntáriu hamutuk rihun resin, atu bele promove arte iha Timor-Leste.

“Festivál durante loron tolu ne'e ha'u senti orgullo tebes ho aktividade ida ne'e mós faz parte dezenvolvimentu, tanba festivál ne'e rasik envolve voluntáriu hamutuk rihun resin, ida ne'e la'os  oiutan maibé barak, maibé espesiál ba ha'u ida atu bele aumenta ami joven sira hotu ninia esperiénsia ida-idak ninian hodi bele kontribui ba ita nasaun,” Dehan Noviana ba Jornalista sira, iha Ponte B.J.Habibie, Domingu (23/11).

Nia dehan, atividade ida ne'e parte animasaun ida oinsá atu eduka joven sira liu husi kriatividade ida-idak oinsá ba futuru bele organiza eventu ruma.

“Atividade ida ne'e hanesan animasaun ba komunidade sira liu-liu ba joven no foinsa'e sira oinsá atu envolve iha grupu ruma, karik ba futuru ita bele organiza eventu ruma hanesan karik ita iha ona esperiénsia oituan, atu bele promove, tanba ne'e hau sujere ba Ministerio Turizmu no Ambiente atu kontínua apoiu no promove joven sira-nia talentu liu husi atividade sira hanesan ne'e, atu nune'e bele miniza problema iha ita rain no  husu nafatin ba kontinua bele iha nafatin,” Nia relata.

Maske ho voluntáriumente, nia informa, ne'e hanesan vantajen ida ba sira atu bele espresa sira nia talentu no kriatividade ida-idak ne'ebé mak durante sira iha.

Iha fatin hanesan, Prezidente Asosiasaun ArtEmpreender, Natalino Fernandes Ximenes informa, objetivu husi harii Festivál Ekulturiz ida ne'e ho objetivu prinsipál mak hanesan hakarak kria oportunidade ba joven sira liuliu hanesan organizasaun ida ne'ebé inisiativa atu promove setór cultural, arte iha Timor-Leste.

“Inisiativa hirak ne'ebé mak ami konbina realiza mak iha asuntu tolu mak hanesan Ekolojia, Kultura no Turizmu, maibé habadak ba Ekulturiz. Asosiasaun ArteEmpreender ne'ebé harii iha 2023 maioria husi artista sira ne'ebé la'o husi parte múzika The Kraken ne'ebé mak iha finansia husi Mana Lita Galeri iha filme nian, ami na'in hirak ne'e mak sai hanesan fundadór ba asosiasaun ne'e,” Nia informa.

Nia dehan, iha kreatividade lubuk ida ne'ebé mak ArteEmpreender halo haraik realiza hodi promove setór kulturál no arte iha Timor-Leste.

“Iha parte arte ami mós hanoin katak hanesan organizasaun ida ne'ebé inisiativa atu promove setór kulturál no arte nian, atu halo dezenvolvimentu ruma ita tenke halo parseiru ho empreza privada sira, entaun ami haree Ministériu Turismu no ambiente iha Nonu Governu konstitusionál ne'e mak ami halo proposta ida atu hatan katak ami iha inisiativa atu promove arte no kultura iha Timor-Leste,” Nia relata.

Entaun Govenru investe ona fatin sira ne'e furak ona mais  labele furak hanesan nee de'it ona, maibe tenke halo moris ho kreatividade ruma atu bele atrai vizitante sira  iha fatin ne'ebé mak govenu prepara.

“Festivál Ekulturiz ne'e foin mak edisaun dahuluk ne'e mak foin ita halo, hanoin halo ida ne'e hanesan projetu pilotu ida para ita bele estuda ninia progresu dezafius sira katak ho partisipasaun ne'ebé mak voluntariu sira apoiu makaas, ita bele kontribui buat ruma ba rai ida ne'e,” Nia esplika.

Purtantu, Diretór Jerál Turizmu husi Ministériu Turizmu, António da Silva informa planu ba Festivál Ekulturiz ne'e lolos destivál bailoron, maibé la konsege tanba iha buat ne'ebé mak presiza atu hadi'a.

 “Planu ba eventu ne'e kauze fulan-lima no neen ona, tanba iha buat ne'ebé mak presiza atu hadi'a, entaun agora foin realiza fali Asosiasaun ArtEmpreender realiza eventu Festivál Ekulturiz ne'e kapás entre Ekolojia, kultura no Turizmu, tanba ne'e hanesan komponente ne'ebé mak importante los, ita hasoru alin sira ne'ebé mak voluntáriu de'it, maibé ho didikasaun loos inklui mós komisaun organizadora ne'ebé mak servisu hamutuk kauze semana rua nia laran para realiza eventu ne'e, espera katak eventu ne'e lori mensajen di'ak ruma ba joven voluntáriu sira bele fo mós atividade ekonomia ba komunidade sira ne'ebé mak partisipa iha ne'e, tanba ne'e lori Governu nia naran kontinua apoiu eventu sira hanesan ne'e karik iha futuru sei iha,” Nia afirma.

Entretantu, Festivál Ekulturiz ne'e realiza iha loron 21 to'o 23 Novembru tinan ne'e, tuir planu sei kontinua iha inisiu fulan dezembru ne'ebé mak envolve nafatin Joven voluntáriu sira no mós promove artista lokál sira.

Enkuantu, Festivál ne’e partisipa masimu husi joven, komunidade suku Bidau Santana, no mós parseiru sira hotu. Fundus apoiu husi Ministériu Turizmu ho montanta rihun $17 .