Reprezentante Servisu Saúde Munisipiu Manufahi Domingos Tavares hatete, servisu saúde Munisipiu Manufahi rejista ona kazu hamutuk 40, tanba ne’e, intervensaun ne'ebé pesoal saúde sira halo durante ne'e hodi responde ba kazu ne'e halo mak tratamentu, akonsellamentu.

Inklui halo monotorizasaun no intervensaun hodi prevene moras ne'e labele hadaet ba ema seluk no pasiente ne'e rasik labele hetan diskrimina husi ema seluk.

"Kazu ne'e iha balun ne'ebé ita halo tratamentu retoviral ne'e la'o hela durante ita nafatin halo akonsellamentu ita halo nafatin halo monotorizasaun, intervensaun hodi prevene ka halakon estigma diskriminasaun ba pasiente sira," dehan Reprezentante servisu saude Munisipiu Manufahi ba Jornalsita sira iha sede suku Betano, Segunda (24/11).

Domingos Tavares hatutan, pasiente pozitivu HIV na’in 40 ne’e, iha na’in 12 maka lakon ona vida no na’in 28  dadaun ne'e halo hela tratamentu.

“Dadaun ne'e pasiente HIV/SIDA halo hela tratamentu tanba, iha servisu saúde Munisipiu Manufahi iha pesoal saúde na'in ida mak toma konta hodi kontrola no halo tratamentu ba pasiente sira," katak Reprezentante ne’e. Enkuantu, kona-ba pasiente sira, pesoal saude sei la fó sira nia identidade.

Husi kazu hirak ne'e, Diretóra Promosaun  Prevensaun no Komunikasaun Angelica da Costa Oliveira hatete, INCSIDA kontinua halo sensiabilizasaun informasaun kona-ba prevensaun virus HIV/SIDA ho nia hada'et sira atu nune’e bele fasilita sira labele hamosu estigma ba pasiente sira.

"Ida ne'e ita hakarak fasilita ita nia komunidade sira ho klaru tanba dala barak ema halo hela estigma no diskriminasaun tanba ema la iha koñesimentu, ne'e mak ita mai ita kopera ho perseiru sira ita fahe informasaun ituan ba sira katak moras ka virus HIV/SIDA nia hanesan mós ho moras sira seluk, kuandu nia halo tratamentu ona sei la hada'et ba ema seluk, no moras HIV/SIDA lanaran hadaet na ema seluk," dehan Diretora.

Enkuantu tuir dadus ne'ebé Ministériu Saúde (MS) fo sai katak, kazu HIV/SIDA dadaun ne'e sae ona ba rihun rua resin (2.040).