Diretora Promosaun Prevensaun no Komunikasaun iha INCSIDA, Angelica da Costa Oliveira hatete, objetivu husi sosializasaun ne’e maka atu eleva kuiñesimentu komunidade sira nia kona-bá moras hada'et virus HIV/SIDA ho nia prevensaun sira inklui tratamentu.
Nune’e, husu ba komunidade sira hakbesik an ba sentru saúde teste ran hodi hatene ida-idak estatus HIV/SIDA nian.
"Ita hakarak jovem sira ne'ebé karik durante ne'e moris ona ou sira hala'o ona hahalok risku ruma bele voluntariumente bele ba hasai ran hodi sira bele hatene sira nia estatus HIV/SIDA," dehan Diretora Angelica ba Jornalsita sira iha sede suku Betanu, Segunda (24/11).
Diretora ne'e hatutan, durante sensibilizasaun ne'ebé INCSIDA hala'o iha kada suku sira, iha mós dezafiu ne'ebé INCSIDA rasik hasoru no dezafiu ne’e mak komunidade barak lakohi rona informasaun ne'ebé INCSIDA fó no lakohi hakbesik aan ba sentru saúde hodi teste ran.
Reprezentante komunidade Suku Betano, Alfredo da Silva hatete, tuir informasaun ne'ebé rona husi INCSIDA katak moras HIV/SIDA ne'e aas ona iha Timor.
Tanba ne’e, nia parte husu ba Ministeriu Saúde (MS) atu toma atensaun oinsa atu halo prevensaun ba moras HIV/SIDA ne'ebé dadaun ne'e eziste ona iha Timor-Leste.
"Ha'u hanoin ida ne'e importante tebes, nune'e ami bele hatene tuir saida mak moras HIV/SIDA, tanba ohin loron inan-aman sira kontinua uza sentimentu ida ne’ebé makaas tanba moe atu ema seluk hatene sira nia moras," dehan Alfredo.
Enkuantu, sensibiliza informasaun ne'ebé partisipa masimu husi komunidade sira, Autoridade lokál inklui seguransa husi FALINTIL-Forsa Defeza Timor-Leste (F-FDTL).
