Tersa, 10 Dezembru 2019 | Login
Palacio Governu Palacio Governu

Governu Kontrata Asesór 1.014 Featured

DILI: Partidu CNRT ne’ebé kaer ukun períodu rua tuituir malu iha 2007-2012 no 2012-2017 sente hafodak bainhira haree númeru asesór ne’ebé governu kontrata to’o 1.014.

 

Maski Partidu CNRT rasik sai aliadu husi governu atuál ne’ebé lidera husi Primeiru Ministru, Taur Matan Ruak, maibé sente dezapontadu bainhira hateke ba lista asesór nasionál no internasionál lubuk ne’ebé governu fó servisu.

Lista ne’ebé Komisaun D Parlamentu Nasionál hetan husi Ministériu Finansas totál asesór hamutuk 1.014 ho saláriu mínimu USD $5.000 to’o USD $21.000.

Ami nia pensamentu ne’e lista asesór ne’ebé barak hanesan ne’e di’ak liu troka funsionáriu públiku lalika servisu hotu, asesór sira mesak mak servisu de’it,” dehan Prezidente Komisaun D PN, Virgínia Ana Belo, ne’ebé mós nu’udar Deputada Bankada CNRT.

Husi asesór sira rasik sei define ba oin rua asesór nasionál no internasionál ne’ebé ho pagamentu saláriu diferente. Ba asesór nasionál simu osan entre USD $5.000 – $7.000 no asesór internasionál entre USD $10.000 - $21.000.

Maski nune’e, husi tabela lista asesór ne’ebé iha seidauk identifika klaramente númeru asesór nasionál no internasionál hira.

Nia hatutan, númeru asesór ne’ebé boot, CNRT nu’udar partidu aliadu husi Governu AMP nian, sei ko’alia iha nivel parlamentu ho governu hodi haree ba asuntu sira hanesan ne’e hodi justifika.

Bainhira halo komparasaun, asesór sira iha Governu sa'e demaziozu, tanba Parlamentu Nasionál maski nu’udar órgaun soberanu ida maibé ninia asesór sira la to’o ema na’in sanulu.

Virgínia dehan, bele aseita ho númeru asesór ne’e bainhira husi totál ne’ebé iha barak liu timoroan kompara kompara ho ema estranjeiru.

Númeru asesór nasionál mak barak ne’e ita bele aseita hodi nune'e bele substituisaun ba asesór internasionál sira, maibé númeru asesór internasionál mak barak liu ne’e ne’e ha'u la aseita”, tenik nia, iha Uma Fukun PN, horisehik.

Nia esplika, iha nasaun balun númeru funsionáriu ema lokál uitoan liu ema estranjeiru tanba forsa traballu rai laran nian menus. Maibé, diferente ho Timor-Leste, ne’ebé ema barak sei dezempregu tanba ne’e presiza fó oportunidade servisu barak liu ba ema rai laran.

Antes ne’e, deputada ne’e mós deklara katak, ministériu balun tau subar asesór nasionál sira no aprezenta de’it asesór internasionál ida iha ninia ministériu no iha kotuk asesór nasionál bele to’o ema na’in 20.

Antes ne’e, iha inisiu tinan 2019, Ministru Reforma Lejizlasaun Asuntu Parlamentár (MRLAP) promete katak, Governu sei halo revizaun ba saláriu mínimu asesór nasionál sira nian tanba balun boot liu saláriu Prezidente Repúblika, Primeiru Ministru no ministru sira nian, maibé tabela saláriu mínimu asesór nasionál sei hahú husi USD $5.000 -$7.000 ne’ebé hanesan no balun boot liu saláriu Xefe Estadu ne’ebé simu USD $ 5.000 kada fulan.

Read 217 times
Rate this item
(0 votes)