Konkretiza asaun hadomi rikusoin tasi ida ne’e, autoridade no komunidade sira iha Com husik lenuk oan. Atividade ne’e hala’o iha selebrasaun loron Restaurasaun Independensia, 20 Maiu 2017.
Lenuk nudar animal ne’ebé mós hetan protesaun. Iha 23 Maiu kada tinan, mundu selebra loron Lenuk nian.
Ho atividade husik lenuk-oan ne’e, komunidade Com hatudu katak sira mós iha interese atu proteze lenuk ne’ebé hetan ameasada extinsaun.
Xefe Suku Com, Sérgio Gouveia hatete, komunidade sira husik lenuk oan hamutuk 180 ba tasi laran.
Iha oportunidade ne’e, nia apela ba komunidade tomak atu labele kaer no oho lenuk. Tanba lenuk ne’e rikusoin ne’ebé bele fó sorte ba povu Com nia jerasaun agora no jerasaun sira iha futuru.
“Ami kontente tebes selebra festa 20 Maiu ho isar bandeira nasionál no hala’o atividade husik lenuk 180 ba tasi tasi Com,” dehan Xefe Suku Com, Sérgio ba INDEPENDENTE iha Com, foin lalais ne’e.
Ba selebrasaun 20 Maiu, komunidade, estudante no autoridade kada suku uza roupa kultura Lautem nian hodi partisipa serimónia isar bandeira nasionál iha tempu dadeer no hatún bandeira iha tempu loraik.
Komunidade Com kontente no orgullu ho selebrasaun ne’e tanba ida ne’e foin ba dahuluk hala’o iha Suku Com.
“Ami povu Com tomak sente orgullu tebtebes ba loron boot Independensia 20 Maiu ba dala-15. Ne’e foin permeraves halo iha suku Com. Ami selebra maske ho orsamentu ne'ebé ki’ik aloka husi Governu, maibé festa ne’e ninia valór boot tebes no povu kontente ho atividade oin-oin,” dehan Xefe Suku ne’e.
