Mekanizmu ne’ebé KFP hala’o la’os mekanizmu foun ida. Iha tinan 2012, KFP serbisu hamutuk ho CNE implementa ona ba funsionariu (FP) públiku sira ne’ebé sai ekipa kampaña susesu ka partisipa iha prosesu kampaña politika.
Prezidente KFP, Faustino da Costa hatete, mekanizmu ne’e bele asegura funsionariu sira nune’e labele prejudika sira-nia servisu nudar funsionariu públiku.
Nia dehan, mekanizmu ida ne’e KFP oferese atu FP sira labele lakon direitu ba vota no mós kandidata an ba membru Parlamentu Nasionál.
“Ami sei halo enkontru ida ho entidade relevante atu hodi esplika mekanizmu ida ne’e. se karik (FP) sira atu ba (tuir kampaña) presiza formularaiu balun ne’ebé presiza atu priense,” dehan Faustino iha salaun Comisaun Nasionál Eleisaun (CNE), Sesta (26/05).
Ba FP sira ne’ebé nia naran tama iha lista kandidatu partidu nian, Faustino dehan, sira tenke husu lisnensa la ho vensimentu nune’e sira bele fokus ba atividade ne’ebé sira hala’o.
Bainhira eleitu, Komisariu ne’e dehan, FP ida bele husu lisensa espesial la ho vensimentu ho durasan tuir kargu ne’ebé nia assume.
Molok ne’e, Vise Ministra Saúde Ana Maria Isabel lamenta ho pesoal saúde balun ne’ebé sai militante ba Partidu Politiku balun no envolve an iha prosesu kampaña politika.
Deklarasaun Vise Ministra ne’e relasiona ho envolvimentu pesoal saúde sira iha Kampaña Kandidatu Prezidente Repúblika iha fulan Marsu 2017.
“Partidu ita iha direitu idaidak ninian, ita hothotu iha direitu atu ba vota, ita idaidak iha dever atu hola parte iha eleisaun, mais la’os atu hatama ita-nia an sai militante ida ne’e ou ida ne’ebá. Ha’u la bandu, sim ita-boot sira hatete katak ida ne’e ami halo fora de oras serbisu. Ita-boot sira hamrik iha ne’ebá hanesan professional. Ha’u hatete tiha ona, kolega sira ne’ebé hakarak ba partisipa ou atu sai tim sukses hatama karta lisensa sein vensimentu, realidade mamuk (laiha),” deklara Ana.
Provedor Direitus Humanus no Justisa, Silveiro Batista Pinto hatete, Konstituisaun RDTL no konvensaun politika sivil garante ema idaidak nia direitu politika katak ema hothotu iha direitu atu envolve iha vida politika.
Silveiro hatete, partisipa iha politika atu ba vota de’it ne’e direitus ema idaidak nian, maibé atu halo politika pratika ne’e labele.
“Iha eleisaun Prezidensial ha’u rasik haruka karta ba Prezidente Komisaun Funsaun Públika Faustino Cardoso, ha’u husu lista, karik iha funsionariu públiku balun mak hatudu karta lisensa sein vensimentu ka la’e, maibé resposta karta husi Prezidente (KFP) fó mai ha’u hatete katak, laiha pesoal funsinariu husi Ministériu ne’ebé de’it mak hato’o pedidu, mais defaktu iha ami-nia monitorizasaun, ha’u hatun ekipa ba iha munisipiu hot-hotu atu halo monitorizasaun, ami deteta, funsionariu públiku balun mak envolve an iha kampañia kandatu Prezidensial nian,” katak nia.
Nia dehan, balun uza patrimonia estadu iha oras serbisu.
