Tersa, 19 Novembru 2019 | Login
×

Erro

An error occured during data fetch from google.com: Error calling GET https://www.googleapis.com/analytics/v3/data/ga?ids=ga%3A138150919&start-date=2017-01-15&end-date=2019-11-18&metrics=ga%3Avisits&dimensions=ga%3Ayear&start-index=1&max-results=1000: (302) 302 Moved

302 Moved

The document has moved here.
AMP asina akordu ukun hamutuk. Foto Doc AMP asina akordu ukun hamutuk. Foto Doc

AMP Hahú "Nakfera" Featured

DILI: Bloku Aliansa Mudansa ba Progresu (AMP) hahú hatudu sinal "atu nakfera" tanba partidu ida-idak kontinua defende ninia interese.

Sira mós hahú hatudu liman ba malu hodi hatete partidu ida mak hetan liu benefisiu iha formasaun governu AMP.

Lista membru governu na’in sia (9), maioria husi partidu CNRT no na’in rua seluk husi partidu KHUNTO ne’ebé Prezidente Repúblika Francisco Guterres seidauk fó posse sai fatór prinsipal ne’ebé hahú hamoris “tensaun” entre partidu iha AMP.

Partidu KHUNTO ho momoos deklara katak governu ne’ebé lidera husi Primeiru Ministru Taur Matan Ruak ne’ebé mós nu’udar Prezidente PLP benefisia de’it partidu refere.

"Politikamente membru governu la kompletu husi KHUNTO no CNRT ne'e fó marjen boot ba PLP hodi asume pasta hotu ministériu ne'ebé tuir loloos KHUNTO no CNRT nian.

Tanba benefisia polítika ne'e fó benefisiu ba PLP de'it, la'os ba CNRT no KHUNTO," deklara deputada KHUNTO Olinda Guterres, iha plenaria Parlamentu Nasionál, Segunda (21/10).

KHUNTU sente sai vitima husi problema membru governu pendente ne’ebé to’o ohin loron seidauk hetan solusan.

"VIII governu ida ne'e sosiu husi partidu tolu hanesan CNRT, PLP no KHUNTO, maibé KHUNTO lakohi sai vítima ba prosesu dezenvolvimentu iha rai ida ne'e nian. Tanba ne'e KHUNTO iha direitu atu troka nia ema ne'ebé iha konfiansa ba serbisu hodi lori dezenvolvimentu nasaun ba oin," nia dehan.

Maske KHUNTO deklara beibeik ona prontu atu troka kandidatu membru governu iha lista pendente, maibé problema mak CNRT mantein pozisaun katak lakohi atu troka no obriga PR Lu Olo atu tenke fó pose.

Prezidente Bankada CNRT Duarte Nunes hatete, CNRT sei mantein nia ema sira iha lista pendente.

“Ami sei mantein tinan lima ka to’o tinan 10 tanba ema nia direitu iha, tanba durante ne’e serbisu ba partidu no partidu rekoñese sira-nia serbisu entaun partidu indika hodi tuur iha fatin ne’e,” dehan nia hafoin plenária PN, Segunda (21/10).

Duarte husu ba PR Lu Olo atu hatudu kandidatu membru governu pendente sira nia sala iha ne’ebé.

“Ami-nia ema ne’e laiha sala, (se) nia nauk, nauk saida? Tanba ne’e mak ami mós hein bainhira mak hatudu nia sala ne’e hodi nune’e ami mós troka ami-nia ema sira ne’e. so ke Prezidente (Repúblika) la gosta ema ida ka rua la fó posse, ne’e viola konstitusaun, (viola) ema-nia direitu,” dehan nia.

Ho ulun-toos husi CNRT, no KHUNTO ne’ebé hahú duun PLP aproveita situasaun halo PM Taur mós hahú lakon pasensia. Ho nune’e, PM Taur mós deklara prontu hasoru eleisaun antisipada bainhira problema membru governu pendente la konsege rezolve.

“Ha’u ohin ko’alia hela ho Pezidente Repúblika, dala-ruma dalan laiha ita ba fali eleisaun de’it karik, ha’u la hatene, maibé ba ha’u nian, ha’u husu atu Parlamentu Nasionál kontinua serbisu hanesan baibain, governu halo esforsu atu atividade la’o,” deklara PM Taur ba jornalista sira hafoin enkontru semanál ho PR Lu Olo iha Palasiu Prezidensiál Bairu-Pite, Tersa (22/10).

Tuir PM Taur, bainhira ema hotu-hotu hakarak atu iha tan eleisaun, nia prontu no apoiu eleisaun refere tuir ema hotu-hotu nia hakarak. “Ita bele ba fali eleisaun, laiha problema, karik dalan dialógu ruma iha ka lae, ne’e ba ha’u di’ak de’it, ba eleisaun mós bele,” katak nia.

Taur afirma, nia ho PR Lu Olo iha enkontru koalia liu de’it kona-ba lista membru governu pendente.

“Maibé daudaun ne’e governu seidauk iha solusaun ruma,” nia hatete.

Maske membru governu seidauk kompletu, maibé PM Taur dehan, durante ne’e governu ninia atividade la’o hela.

“Naturalmente ne’e hanesan futebool karik tim ida ne’e (na’in) 11 (maibé) ba 6 de’it, la kompletu, ne’e jogu mós difikuldades, entaun governu iha difikuldades bainhira membru governu la kompletu maibé atividades la’o hela.”

“Se ita kompara 2019 ho 2018 ho 2017 iha kompletamentu iha mudansa projesaun. Agora kresimentu ba 2019 ne’e 5,1 pursentu, ne’e ita iha 2017, 2018 ne’e iha resesaun 3,5 pursentu, entaun dehan atividade la la’o ne’e tanba saida? Ha’u hanoin la’o, buat ne’e la’o di’ak hela,” deklara PM Taur hodi responde ba deklarasaun balun ne’ebé hatete governu nia atividade la la’os.

Hatan ba deklarasaun husi deputada KHUNTO Olinda Guterres, PM Taur dehan, hanoin husi deputada ne’e la loos.

"Ida ne'e la loos, ha'u hanoin la loos, la loos tanba sira ne'ebé seidauk toma pose ne'e, entaun sira ne'ebé agora iha ne'e halo interinamente par dezenvolve atividade, par abanbainrua iha hotu ona, entaun ida-idak asume nia funsaun ne'e," dehan Taur.

 

Read 466 times
Rate this item
(0 votes)