Tanba ne’e maka Lere ninia hanoin katak Forsa Defeza mós presiza ema ne’ebé nasionalista no “Dala-ruma ema balun kestióna, foti problema Lere nia intervensaun sira ne’e.

Lere la’os dehan katak otonomista hotu-hotu ninia oan ne’e labele (sai membru F-FDTL), otonomista balun ne’ebé uluk 1999 hamutuk kedas iha ne’e, ha’u hanoin katak depois tinan sanolu resin ne’e, sira nia mentalidade muda ona, fase kakutak ona kona-ba dehan “ha’u Timor-oan no ha’u sente orgullu Timor-oan ukun aan,” dehan Lere hafoin hasoru-malu ho Prezidente Repúblika Francisco Guterres Lu Olo iha palasiu prezidensial, Bairo-pite, Kuarta (06/11).

Tanba tuir Lere, atu sai membru F-FTL importante liu tenke iha espiritu nasionalizmu no patriotizmu tenke maka’as no forte.

“Agora inan-aman iha Indonézia ne’ebá ne’e labele fahe ba rua, tenke hadomi ida de’it katak o nia rain o nia povu, se funu ruma o tenke aseita atu fakar o nia raan, atu defende o nia soberania, ida ne’e mak importante, ne’e mak ema labele kestióna,” dehan Maijor Jeneral Lere.

Tan ne’e, nia hatutan, ba rekrutamentu iha tinan 2020, F-FDTL liu husi komisaun ba rekrutamentu nian kria ona kriteria no haruka on aba governu atu bele aprova.

“Kriteriu ida ne’ebé la sees husi nasionalizmu, patriotizmu ba Timor-oan ne’ebé hakarak tama ba instituisaun seguransa ho defeza nian,” deklara nia.

Tanba, Lere afirma, ema labele kompara instituisaun defeza no seguransa ho instituisaun seluk governu nian.

“Ezemplu, polítiku governu tinan lima-tinan lima troka malu no bainhira funu ruma mós sira ne’e bele halai ba ema nia rai mak mai fali mós di’ak, maibé ema militar laiha, iha juramentu ne’ebá bainhira nesesariu fó ninia vida rasik.

Entaun ne’e presiza nasionalizmu ne’ebé FALINTIL hatudu (durante) tinan 24”.

“Ema hotu hatene katak FALINTIL nia devér, nia obrigasaun, uluk iha ai laran ne’e balun kestióna ho ninia devér, obrigasaun atu liberta povu ho nasaun. Maibé agora sira laiha ne’e ona, sira uitoan de’it mak iha ne’e, entaun devér obrigasaun FALINTIL ninian iha 24 anos ne’e mak mate ba nasaun no mate ba povu, depois see mak moris ukun rasik aan ba, maibé sira mak fakar tiha ona sira-nia raan”.

Kona-ba prioridade ba veteranu nia oan, Lere dehan, iha rekrutamentu ba tinan 2020 sei fó nafatin prioridade ba veteranus nia oan.

“Rekrutamentu ba F-FDTL fó prioridade ba veteranus nia oan ne’e nafatin, naran sira prienxe kriterius, só iha moras labele mai, se TBC labele mai, se HIV/SIDA labele mai, ain sorin tohar labele. Labele dehan katak ha’u veteranus nia oan ne’ebé ain tohar mós ba, ne’e demais ona,” katak nia.

Hatan kona-ba deklarasaun husi Vise Xefe Estadu Maior F-FDTL Brigadeiru Jeneral Falur Rate Laek katak la fó prioridade ba veteranu nia oan, Lere lakohi fó komentariu ho razaun iha militar iha irarkia komando.

“Ha’u hanoin katak ita la hanesan, Timor-oan ne’e ita Timor-oan duni, maibé kestaun dignidade, kestaun onra, ita la hanesan,” dehan Lere.