Primeiru Ministru, Mari Alkatiri hateten, hakarak ka lakohi tenke hapara akordu ne’ebé ministru turizmu ona, bainhira atu hala’o atividade ruma tenke tuir lei.

Nia dehan, bainhira sasán sira ne’ebé atu akontese iha nasaun ne’e tenke tuir lei, la’ós tama arbiru de'it to’o ikus kria konfuzaun iha rai laran.

“Ha'u haruka suspende ona, ha'u mak manda iha ne’e. Tanba Governu ne’e iha xefe ida de'it, la'ós xefe rua-tolu”, tenik Alkatiri, iha Palásiu Governu, horisehik.

Nia hatete, nu'udar Primeiru Ministru hatún ona orientasaun suspende ona orientasaun ne’ebé ministru turizmu, halo akordu ho kompañia rua ne’ebé hakarak loke jogu kasino no otél iha nasaun ne’e.

Tuir informasaun, kompañia rua ne’e husi Japaun mak Homotomo atu loke kasino no kompañia seluk husi Indonézia atu loke kasino ho otél iha Dili laran.

Xefe Governu hatutan, bainhira akordu ruma ne’ebé akontese iha Governu ne’e kompeténsia boot Primeiru Ministru mak tenke foti desizaun, la’ós ministériu mak foti desizaun ba atividade jogu sira ne’e.