“Agora ne’e governu jestaun ka governu demisionáriu. Ne’e presiza define pozisaun governu ne’e”, dehan Prezidente Bankada CNRT, Arão Noe de Jesus, iha Uma Fukun PN, horisehik.

Bazeia ba Konstituisaun artigu 108 kona-ba programa governu laiha, ne’e hahú tama ona ba kategoria governu jestaun. Entaun sira laiha podér hodi halo aprovasaun ka halo desizaun ruma.

Tanba ne’e, iha 26 Janeiru disolve tiha PN hodi pronunsia eleisaun antesipada tuir loloos governu mós nia estatutu sai hanesan governu demisionáriu.

Ne’e duni, governu atuál labele halo desizaun ruma, maibé sira kontinua halo aprovasaun ba jogu kasino. Ne’e podér mai husi ne'ebé? Kuandu governu jestaun ona sira so halo de'it ba manajementu ba administrasaun nian.

Tuir nia, kuandu iha eleisaun antesipada maka partidu ida manan fali, kontratu ne'ebé sira halo ona sei hapara hotu, tanba la tuir konstituisaun.

Iha fatin hanesan, Vise-Prezidente Partidu Demokrátiku (PD), Luis Mendes hatete, VII governu legál no konstitusionalmente. Tanba ne’e, laiha governu jestaun.

Parlamentu Nasionál hetan ona disolusaun mós governu ne’e sei la monu no kontinua eziste.

Konstituisaun artigu 112 hateten, kuandu governu ne’e monu bainhira programa dala rua tuituir malu hetan rejeisaun ka PM hetan susar ruma.