Kinta, 18 Jullu 2019 | Login
Ilustrasaun Na'ok Teen foti osan mean. FOTO: dok Ilustrasaun Na'ok Teen foti osan mean. FOTO: dok

Na'ok Teen Rakut Sai Osan Mean Husi Estudante Nia Isin Lolon Featured

DILI: Ema deskoñesidu taka oin metin ho motór rakut sai labarik estudante feto ida husi Eskola Ensinu Báziku Santa Madalena de Canossa nia osan mean hanesan korrente no brinkus rua iha Manleuan.

Kazu ne’e akontese iha loron Segunda (18/03), dadeer,  hafoin estudante  ne’e nia aman lori ba hatún iha portaun eskola oin, la too minutu balun alunu foin la’o hakat tama ba portaun eskola, derrepente  de’it  na'ok teen ne’e halo kedas asaun  no ameasa hodi hadau sasán osan mean husi labarik nia isin lolon.

Hafoin rakut sai osan mean husi estudante ne’e ninia kakorok no tilun rua, ema deskoñesidu ne’e halai kedas ho motór hodi halo estudante ne’e tanis no trauma hodi hato’o kedas keixa ba parte seguransa Conossa hodi buka  tuir maibé la hetan.

Ho akontesimentu ne’e, seguransa no estudante balun mós lori kedas estudante ne’e ba hasoru madre hodi kontaktu kedas parte inan aman hodi hakalma trauma ne’ebé estudante ne’e hasoru.

Tuir informasaun ne’ebé diariu ne’e rekolla husi parte seguransa Santa Madalena Canossa Manleuana nian ne’ebé lakohi publika nia naran katak, asaun ne’e akontese iha segunda (18/03) tuku 7:00, dadeer.

Nia dehan, hafoin kazu ne’e akontese sira tenta duni tuir na'ok ten ne’e, maibé la konsege hetan, tanba halai ho motór.

“Labarik ne’e tanis dehan ema na'ok ninia korrente no brinkus, ne’e ami foin hatene hodi buka tuir maibé la hetan tanba ema halai ona,” nia informa.

Entretantu iha parte seluk, Diretora Fundasaun Canossa, Madre Juvita da Conceição lamenta no preokupa ho kazu ne’ebé akontese ba estudante ne’e.

Ho kazu ne’e, Madre husu ba inan aman husi alunu estudante Pre-Primária,  Primária, Pre-Sekundáriu no Sekundária atu labele hatoman oan sira ba eskola uza sasán osan mean hanesan, korrente, brinkus no kadeli inklui uza telefone.

“Aviza ba estudante sira atu hato’o ba inan aman sira labele hatoman imi mai eskola atu uza brinkus, kadeli no lori telefone, tanba ita la hatene agora ema na'ok imi osan mean, e dala ruma tempu seluk ema bele naok mós imi,” dehan Madre hodi alerta ba estudante sira, kuarta (20/03).

Madre konsidera kazu ne’e sai atensaun boot ba estudante sira atu hato’o ba inan aman sira atu kumpre mós regra eskola nian ne’ebé hakerek klaru ona atu bandu oan sira ba eskola labele lori sasán osan mean inklui lori telefone.

“Aviza ba alunu sira hotu di’ak liu mai eskola labele lori telefone, ita la hatene imi mai nonton fali buat seluk iha kotuk ita hanorin imi la konsentrasaun,” nia hatete.

Madre dehan, alunu sira so livre uza sasán osan mean ba festa no ba misa, maibé atu ba eskola di'ak liu lalika uza sasán osan mean.

“Imi ba misa ka festa bele uza brinkus, kadeli no korrente, maibé mai eskola di'ak liu lalika uza,” nia hatete.

Madre ne’e dehan, dezde eskola ne’e harii iha tinan 2000 too agora foin primeiraves akontese problema ema hadau estudante sira nia sasán osan mean.

Too notísia ne’e hatun, diáriu ne’e la konsege halo entrevista no parte inan aman no estudante ne’ebé sai vítima.

Read 1663 times
Rate this item
(0 votes)