PDHJ halo monitorizasaun ba distribuisaun tratór manual durante tinan ida nia laran iha munisipiu hotu-hotu, inklui rejiaun autonomu Oekusse.

Liu husi monitorizasaun ne’e, PDHJ konsege lista hand tractor hamutuk 846 ne’ebé MAP fahe ona. Maibé, PDHJ mós lamenta tanba to’o ohin MAP rasik la hatene tratór hira mak utuliza no hira mak la utuliza.

Provedora Jesuina Maria Ferreira Gomes informa, iha relatoriu monitorizasaun ne’e, PDHJ deteta problema lubuk ida iha jestaun.

“Ami rekomenda ba Ministériu Agrikultura no peskas atu hadia, liu-liu liga ho asuntu prosedimentu ne’ebé Ministériu Agrikultura no Peskas kria ona maibé implementasaun ne’e la la’o tuir saida mak iha,” deklara Provedora ne’e iha salaun PDHJ, Kaikoli, Sesta (23/03).

Liu husi monitorizasaun refere, nia hatutan, PDHJ deteta mós hand tractor ne’ebé fahe ona ba agrikultór sira iha Munisipiu laiha lista.

“A’at liu tan mak akordu verbal ne’ebé Ministériu relevante halo ona ho grupu agrikultór sira maibé nunka hetan manutensaun ka kombustivel,” dehan nia.

Problema seluk ne’ebé konsidera nu’udar problema boot ne’ebé PDHJ deteta mak hand tractor ne’ebé MAP fahe ba Munisipiu balun indivisiu ka pesoal agrikultór ida fa’an ba privadu ida.

“Kazu ida ne’e akontese iha iha Munisipiu Vikeke,” deklara nia.

Tan ne’e, PDHJ rekomenda ba MAP atu haree no foti medida ruma ba problema hirak ne’e, tanba hand tractor ne’e uza orsamentu estadu. 

“Ida ne’e responsabilidade MAP nian oinsa atu foti medida ba situasaun ida ne’e. Ami indentifika, haree husi parte administrasaun nian no mós parte husi irregularidade nian,” dehan Jesuina.

Iha fatin hanesan, Inspetor Jeral MAP Octavio de Almeida apresia ho relatoriu PDHJ nian.

Tuir nia, identifikasaun husi monitorizasaun PDHJ ne’e sei ajuda hodi hadia politika MAP.

“Hahú husi 2004 mai ne’e presiza dezenvolvimentu iha rai laran. Tanba kondisaun agrikultura sira nian sei susar entaun tenke iha politika ida oinsa mak ajuda agrikulra sira atu serbisu ho di’ak liu tan,” katak nia.