Tuir akuzasaun husi MP, iha loron 15 fulan-Maiu 2018, tuku 3:00 loraik, lezada foin mai husi Uatulari. Hafoin lezada too uma arguida ho nia kolega sira komesa so’e lia, tolok no duni lezada sai husi uma.
Arguida mós baku lezada nia liman hodi rezulta moras no bubu.
MP akuza Arguida MC ho krime koa autór ho forma konsumadu ba krime violénsia doméstika ho forma ofensa integridade fíziku simples ne’ebé previstu iha arguidu 145 husi kódigu penál.
Molok halo julgamentu,Tribunál husu ba lezada atu bele dada krime tanba ho natureza semi públiku.
Tan ne’e, Lezada hakarak dada fali krime ne’e hodi dame ho arguida iha tribunál. Maibé, Tribunál husu ba arguida atu iha futuru labele tolok no tarata, tan nia ina ki’ik.
“Ha’u arguida sira nia inan ki’ik hanesan tanba sira nia aman hola fali ha’u,” dehan lezada.
Arguida dehan, nia aman hola lezada tanba feen boot mak haruka, la’ós lezada hadau sira nia aman .
Hafoin rona deklarasaun, tribunál husu ba arguida husu deskulpa ba lezada.
Entretantu, Parte defeza no Ministériu Públiku konkorda ho lezada nia deklarasaun husu ba Tribunál atu omóloga no absolve arguida husi distánsia krime ne’e.
Audiénsia Julgamentu prezide husi juis Singulár Ivan Suritay, Ministériu Públiku reprezenta husi prokuradóra Benvida de Rozario no arguidu hetan asisténsia legál husi defensór públiku.
