Tersa, 18 Juñu 2019 | Login
Ilustrasaun selu indinimizasaun. FOTO: HolaDoctor Ilustrasaun selu indinimizasaun. FOTO: HolaDoctor

Bainhira ‘Obrigadu’ Sai Karun Featured

LORO-MANAS ne’e, Arnaldo Bere Reis ne’ebé foin fila husi tula kafé iha Boboleten hakat ba tuur iha nia primu sira-nia uma. Teki-teki rona lian tarutu maka’as. Mane na’in rua ne’ebé tula malu ho motor monu.

Ho ansi, Arnaldo ho ho nia primu hakat ba fatin akontesimentu. Motor ne’ebé ohin sira haree halai mai husi diresaun Atsabe ba Lauana hetan asidente.

Bainhira haree mane na’in rua latan hela iha rai, Arnaldo ho nia primu no komunidade balun ho lalais koko atu fó asistensia. Maibé, vitima asidente ida hiit oin hodi hasai lia-fuan ne’ebé ema la imajina.

“O mak jagoan iha ituan ne’e ka?”, dehan vitima asidente ida hodi refere ba Arnaldo ne’ebé koko hela atu ajuda nia.

Maske nune’e, Arnaldo ho nia primu sira la preokupa ho lia-fuan refere no kontinua ajuda. Sa tan vitima na’in rua ne’e sei iha relasaun familia ho Arnaldo.

Arnaldo husu ba nia primu, Marcelo, atu tula vitima sira ba sira-nia hela-fatin. Maibé, vitima asidente ne’e hanesan la preokupa ho intensaun di’ak husi ema sira ne’e no kontinua hasai lia-fuan provokativu ho intensaun ameasa.

“Ami monu bé nusa? o haan besi ka, ka o mak jagoan iha ituan ne’e?” vitima asidente hasai tan lia-fuan ba Arnaldo.

Arnaldo hahú lakon pasensia no koalia hatan hasoru vitima asidente ne’e, no vitima ne’e hahú emosaun liu tan no hasai lia-fuan tolok. Nune’e sira hahú diskuti-malu no konsege para hafoin Arnaldo nia tiun no primu sira ba sori.

Maske sente nervozu, maibé Arnaldo husu nafatin ba Marcelo atu ajuda tula hela vitima asidente ba nia uma.

Ikus mai Marcelo tula duni vitima asidente sira ho motor, maibé seidauk halai dook vitima asidente na’in rua ne’e ameasa Marcelo atu baku mate bainhira la hatun sira. Marcelo ne’ebé tauk hatuun vitima asidente na’in rua ne’e iha dalan.

Hafoin tuun husi motor leten, vitima asidente ida hakilar ba Marcelo dehan “O miring ha’u ida Rom…. ne'e miring at liu o”.

Hafoin ida ne’e, vitima asidente na’in rua ne’e fila ba hodi buka Arnaldo no sira baku Arnaldo nia ai ho besi kanu ne’ebé rezultadu nia ain ruin sorin nakfera.

Kazu ne’ebé akontese iha 3 Jullu 2018 ne’e konsege tama tribunal, no iha 19 Fevereiru, Tribunal Munisipiu Dili (TMD) hala’o prosesu julgamentu hasoru arguidu na’in rua ho inisial RD no JS ne’ebé halo agresaun fiziku hasoru lezadu Arnaldo Bere Reis.

Molok hala’o julgamentu, tribunal husu ba lezadu atu dada fila fali krime ne’e tanba konsidera krime ne’e ho natureza semi-publiku nune’e lei fó dalan bainhira lezadu hakarak dada fila fali.

Hatan ba ida ne’e, lezadu Arnaldo deklara nia bele dada fila fali kazu ne’e maibé ho kondisaun ida, katak arguidu sira tenke selu fila fali osan ne’ebé durante ne’e lezadu gasta hodi halo tratamentu ba nia ain ruin ne’ebé nakfera.

“Ha’u mos hakarak dada fila krime ne’e tanba arguidu sira ho ha’u sei iha relasaun familia, maibé arguidu sira tenke selu indimizasaun $4.000,” dehan lezadu ba Tribunál iha sala audesia julgamentu TMD, Tersa (19/02).

Arguidu sira mós deklara prontu atu selu indimizasaun iha fulan ida ne’e nia laran. Iha oportunidade ne’e arguidu sira mós husu deskulpa ba lezadu ba hahalok at ne’ebé sira halo ona.

“Ami lori osan ne’e mai iha Tribunál hafoin Tribunál entrega ba lezadu,” dehan arguidu sira.

Ho desizaun husi lezadu ne’e, Ministériu Públiku no Defensór Públiku husu ba tribunál atu homolga arguidu sira husi distansia krime ne’ebé sira komete.

Kazu ne’e bele sai lisaun importante. Tanba iha altura ne’ebá, bainhira hetan tulun husi ema, ibun la toos atu hasai lia-fuan ‘obrigadu’ no odiu ho emosaun la domina neon, istoria karik sei sai oin-seluk. Karik moras to’o de’it iha asidente no ain mós sei la hakat to’o mai iha tribunal.

Read 932 times
Rate this item
(0 votes)