“Governu abandona hela nia kazu, depois hala’i,” dehan Cilio liu husi dialogu ho Prezidente Republika Taur Matan Ruak iha Suku Fatuhada-Dili, Kinta (26/01).

Tuir nia, ida ne’e hatudu katak lei ne’e vale de’it ba povu ki’ik sira, maibé la vale ba ukun-nain sira.

“Ami povu ki’ik, ami kumpri ba justisa hodi tama komarka,” katak nia.

Nia kompara kazu Eis Ministra Justisa (MJ) Lucia Lobato ho Eis Ministra Finansas (MF) Emilia Pires.

“Lucia bele koopera ho justisa. Tanba saida Eis Ministra Finansas Emilia Pires lakohi koopera ho justisa Timor-Leste nian, depois hala’i tiha ba Portugal? nega tan sidadaun Timor-Leste,” nia lamenta.

Tauk La’o Kalan

Entretantu, komunidade sira iha Fatuhada tauk ho situasaun iha tempu kalan, tanba mosu grupu bandalismu ne’ebé hala’o movimentu.

Komunidade  Aldeia 01, José Carlito Pinto hatete, iha tempu kalan komunidade sira tauk atu hala’o atividade tanba grupu balun halo movimentasaun ho Rama Ambom.

Ba preokupasaun ne’e Prezidente Republika Taur Matan Ruak deklara, situasaun sira ne’e la’os komunidade sira de’it mak preokupa, maibé Estadu mós preokupa.

“Koalia kona-ba seguransa, ita-nia preokupasaun, ida ne’e Estadu no Governu no mos Parlamentu no Timor-oan barak mak preokupa. Maibé, lei iha ona Parlamentu atu estabelese, tan ne’e PR hein PN haruka mai, ha’u sei promulga hodi garantia seguransa, liliu kona-ba kazu sira ne’e mak ema uza rama ambon,” dehan PR Taur.

PR Taur  apela atu komunidade sira ajuda autoridade hodi reforsa seguransa komunitariu iha suku laran nune’e grupu sira ne’ebé mosu ne’e bele tauk.

Xefe Governu husu mós ba inan-aman sira atu eduka sira-nia oan nune’e labele buka baku malu de’it.

“Kuandu hanorin ita-nia oan sira la’os baku de’it, maibé tenke hanorin ho matenek atu nune’e sira bele evita sira-nia an husi konflitus,” dehan nia.

Maske nune’e, PR Taur afirma katak, sei la fó peradun ba sira ne’ebé mak kaer rama ambon.