Maibé, Xefe Estadu ne’e dehan, nia la aseita bainhira Guarda Operasaun Merkadu Munisipiu Dili (GOMMD) oho komunidade nia animal ne’ebé kesi iha uma.

“Ha’u apoiu oho animal sira la’o iha estrada ka iha fatin públiku, maibé ba sira ne’ebé iha uma ne’e labele,” dehan PR Taur bainhira hala’o dialogu ho komunidade sira iha Santa Kruz, Postu Administrativu Na’i Feto, Munisipiu Dili, Sabadu (28/01).

Deklarasaun PR Taur ne’e hodi responde ba preokupasaun husi Komunidade Santa Kruz, Pedro Soares kona-ba programa kasa animal Munisipiu Dili nian.

“Ami komunidade sente triste bainhira Governu foti desizaun tuir de’it sira-nia hakarak, tanba sira kuandu tun mai ne’e oho ami-nia animal arbiru de’it, mas kuitadu ho ida ne’e maka ami fa’an hodi selu ba oan sira-nia eskola no balu sustenta ba ami-nia nesesidade lorloron,” deklara komunidade ne’e.

Nia preokupa tanba GOMMD ba oho komunidade sira-nia animal ne’ebé sulan iha luhan laran.