Premiadu Nobel da Pas ne’e dehan, nia ba Kolombia hodi atende konvite husi Prezidente Repúblika Kolombia nian.

“Ha’u sei kontinua hala’o serbisu iha li’ur. Sabadu, ha’u tenke ba Kolombia,” dehan Horta iha dadalia ho jornalista sira iha ninia Rezidensia Metiaut, Dili, Kinta (26/01).

Horta dehan, nia koñese Kolombia dezde tempu okupasaun. Iha tinan 1997-1998, nia halo ona mediasaun iha Kolombia.

“Tanba Prezidente Kolombia mak bolu ha’u atu ba iha ne’eba. Uluk kedas antes Timor-Leste hetan independensia 1997-1998, ha’u halo mediasaun iha Kolombia, ne’ebé sira hatene, maibé ha’u ba loron balun de’it,” informa Horta.

Hafoin husi Kolombia, Horta dehan, nia sei ba fali Guinea Bisau hodi atende mós konvite.

“Semana ida de’it, depois (fila mai Timor-Leste), iha ne’e ha’u sei partisipa kampañia par haree, (sai) observadór,” dehan Horta.