Segundu Komandante PNTL Munisípiu Dili, Superintendente Asistente Euclides Belo dehan, PNTL halo ona identifikasaun ba área sira daudaun ne’e lema grupu arte-marsiál sei pinta iha fatin publika no bairru sira.

Nune’e, bairru sira ne’ebé PNTL identifika ona maka parte Komoro nian hahú husi Tasi-Tolu, Fatuhada, Eskola São Paulo VI sorin, Bidau no suku Gricenfor.

Nia Dehan, iha bairru balun ne’ebé PNTL hamutuk ho autoridade lokál sira konsege hamoos hotu ona lema arte-marsiál pinta iha bairru laran ho fatin públiku.

“Ami sei esforsu aan hodi koopera hamutuk ho entidade sira hotu atu hamoos lema arte marsiál ne'ebé pinta iha fatin públiku”, dehan Euclides iha Komandu PNTL Munisípiu Dili, Kaikoli, horisehik.

Nia hatutan, polisia identifika ona bairru sira, tanba ne’e sei koopera ho segurada sivíl, jestaun merkadu no autoridade lokál sira sei tun direta hodi apaga hotu lema arte-marsiál bazeia ba Lei Armas Brankas ne’ebé promulga ona.

Nia dehan, bainhira halo operasaun PNTL ho entidade seluk sei tun urjente la fó sai data fiksu.

Biban ne’e, nia apresia ho suku foun Madohi ne’ebé lidera xefe suku Teki Timor alerta ba komunidade iha suku ne’e hodi apaga hotu lema hirak ne’e iha suku laran tomak.

Labele Taka Sticker iha Sinais Tránzitu

Alende ne’e, komandante ne’e mós informa katak PNTL sama atensaun ba lider partidu polítiku sira hamutuk ho ekipa susesu labele taka sticker partidu nian iha sinais tránzitu ne’ebé harii iha estrada ibun.

Nia hatutan, CNE ho STAE bandu ba partidu polítiku tomak labele taka sticker iha fatin públiku liuliu iha sinais tránzitu.

Nia informa, komandu orienta ona membru sira hodi lees hotu sticker partidu polítiku sira ne’ebé taka iha sinais tránzitu iha Dili laran tomak.

Nune’e, sticker sira parpol nian komandante identifika iha Liceu nian ho área seluk ne’ebé sinais tránzitu monta ba.

Tanba ne’e, nia sama atensaun ba partidu polítiku sira labele monta sticker iha sinais tránzitu tanba CNE ho STAE bandu ona.