Deputada Anastasia da Costa Amarál observa katak, iha Díli laran kuaze nakonu deit ho lixu, ne’e tanba  komunidade rasik  la hadomi ambiente hodi soe foer arbiru deit.

“Hau hanoin ita labele fo sala ba iha parte Saneamentu tanba sira servisu makaas ona maibé ita rasik mak la iha konsiensia atu hadom ita nia ambiete,” dehan deputada Anastasia iha Parlamentu Nasionál horseik.

Nia mos hare iha sikun-sikun sidade nian liuliu iha parte Delta aifuan sira iha vaju ema pinta arbiru deit no balun ema tuda to nakfera, ema ida la ba hare, oinsa maka bele halo sidade sai furak.

Iha fatin hanesan deputada husi Komisaun E  Jacinta Abucau mós husu ba ema hotu atu  kuidadu ambiente tanba nee buat ida fasil liu iha moris ne’e. Importante maka konsiênsia deit.

“Ita la’o iha Dili laran, ita hare moru no fasilidade sira hanesan lampu merah sira ne’ebe mak avaria, ida ne’e tanba joven sira ne’ebe fila kalan husi festa hemu lanu depois tuda at buat sira ne’e entaun ida ne’e mos parte ida la halo imázen sidade la furak,” nia kestiona.

Deputada nee espera katak, tinan rua tolu mai komunidade hotu  iha ona konsiensia hodi hamutuk ho estadu para hare fasilidade sira ne’ebé governu monta iha dalan sira e para halo ambiente furak.