Organizasaun internasionál ne’ebé servisu iha ne’e dezde tinan 2005 servisu ho komunidade no governu lokál kona ba saneamentu no ijiene iha komunidade, parseria ho ONG nasionál sira.

“Ami suporta governu hodi atinje objetivu hodi fo servisu ba Timor oan hotu to’o tinan 2030,” dehan reprezentante Water Aid Alex Krambly ba jornalista sira iha otél Timor horisehik.

Nune’e mos kontinua ba futuru atu sufisiente ho kualidade diak tanba agora impaktu husi mudansa klimátika, populasaun aumenta,  impaktu ba rekursu bee no servisu saneamentu.

Iha fatin hanesan, Diretór Interinu diresaun Nasionál mudansa Klimátika (MCIA) Luis Belo rekoñese NGO internasionál ida ne’e nia programa implementasaun ba suply bee ba populasaun ne'ebé hela iha área  rurál no mós kona ba saneamentu.

“Polítika MCIA agora daudaun halo hela draft, seidauk finaliza. Ami labele hatete katak ne’e dokumentu ida ne’ebé válidu tanba seidauk aprova, maibé ita iha polítika diak oinsá integra programa mudansa klimátika ba setór hotu,”dehan Luis ba jornalista sira iha otél Timor horisehik.

Draft polítika mudansa klimátika nian sei iha diskusaun nia laran hodi bele akumula ema hotu nia hanoin no opiniaun iha polítika ne’e nia laran para polítika ne’e sai dokumentu legál ida, ema hotu satisfás.

Dezenvolvimentu ne'ebé halo, sustentavel la'ós halo ohin aban aat ona, maibé tenke dura ba tinan naruk hodi bele poupa orsamentu estadu no fasilita populasaun ba moris diak no ambiente ekilíbriu.

Nune’e mos Diretór Nasionál Jestaun Rekursu de Água Gustavo da Cruz          hatete, saneamentu nudar fatór determinante  iha afetasaun ba mudansa klimátika. Tanba ne’e fahe informasaun ba parseiru sira oinsá tau atensaun iha setór bee  iha aliterasaun klimátika ne’ebé akontese.

“Bainhira udan been menus, afeta ba rezerva bee. Kuandu tasi sa'e, afeta ba kontamina bee rai okos ne’ebé iha,” dehan Gustavo.