Tuir Horta, husi akordu 240 ne’ebé asina maibé foin implementa 21 ne’e nudar failansu boot.

Eis PR ne’e dehan, impelemtasaun husi akordu sira ne’e runguranga, tanba Ministru no Sekretáriu Estadu barak hala’o viajen arbiru no asina akordu arbiru sein konsulta ho Ministériu Negosiu Estranjeiru no Kooperasaun no Konsellu Ministru.

“Ministru sira loos laiha kompeténsia atu asina akordu, maibé sira asina arbiru akordu, arbiru de’it,” dehan Horta ba jornalista sira iha Hotel JL Vila, Kinta (16/03).

Maske nune’e, Horta dehan prontu atu ajuda governu foun atu harii komisaun independente ida hodi halo avaliasaun ba MoU hirak ne’ebé seidauk retifika no implementa.  

“Se Primeiru Ministru foun mai bolu ha’u, ha’u prontu atu kaer komisaun grupu serbisu ne’ebé iha forsa atu haree problema akordu, MoU sira, atus ba atus ne’ebé Timor asina,” dehan Horta.

Ekipa ne’e, nia dehan, karik forma duni, sei bolu Ministru sira ne’ebé asina akordu atu esplika razaun sira asina nune’e estadu bele hatene ninia objetivu jerál no implementasaun.

Hatan kona-ba akordu ne’ebé asina ona maibé governu seidauk lori ba Parlamentu Nasionál (PN) atu retifika, Horta dehan, ida ne’e hatudu inkompeténsia governu nian.

“Ne’e hatudu inkompeténsia membru governu, la hatene sira-nia mandatu serbisu ne’e saida,” katak premiadu Nobel da Pás ne’e.

Molok ne’e, Primeiru Ministru Rui Maria de Araujo deklara katak akordu ne’ebé governu asina la’os la implementa, maibé tanba governu seidauk lori ba Parlamentu Nasionál atu retifika.

“Iha  observasaun  ida, la’os implementasaun mak la hotu, maibé iha akordu barak  ita  asina  tiha seidauk lori ba retifika iha Parlamentu Nasionál,” dehan Rui, Kuarta (15/03).

Tuir nia, hafoin asina akordu Ministériu relevante mak buka forma oinsa atu halo implementasaun.

“La’os laiha implementasaun, klaru ke balun seidauk implementa ,balun que implementa (ona), maibé prosesu implementasaun ne’e depois akordu sira ne’e asina, Governu liliu Ministériu kompetente sira buka forma oinsa (atu) implementa,” dehan nia.