Segundo Komandante PNTL Munisipiu Dili, Superintendente Asistente Euclides Belo dehan, Komando PNTL prepara membru 300 resin hodi asegura seguransa durante festa paskua.
Nia esplika, ba kada Igreja sei koloka membru PNTL na’in 4, no ba bairru ne’ebé iha potensia konflitu Komando sei husu apoiu husi Unidade Espesial Polisia (UEP) iha ne’eba.
“Atu labele mosu konfrontasaun iha festa Paskua membru 300 resin prontu hodi fó seguransa,” informa Euclides ba Jornalista sira iha Komandu PNTL Munisipiu Dili, Kuarta (12/4).
Euclides dehan, seguransa ba festa Paskua sei ba shift rua. Shift loron no shift kalan hodi halo seguransa no operasaun.
Nia dehan, Komando Munisipiu Dili sei hasa’e volume operasaun iha tempu Paskua tan ne’e apela ona ba Komandante Eskuadra sira hodi haforsa seguransa iha Kapital Dili laran, inklui Eskuadra Metinaro, Hera, no Atauro.
Joven Tenke Hakribi Violensia
Entrentatu, Superintendente Asistente Euclides husu ba joven sira atu tama loron Paskua ne’e tenke hakribi violensia.
Nia apela ba joven sira iha Timor laran tomak, liliu iha Kapital Dili atu hakmatek no labele kria konflitus ne’ebé ikus mai bele rezulta oho-malu hodi sobu establidade nasaun nian.
“Bainhira joven sira komente iha konfrontasaun, polisia sei kaer, halo investigasaun hodi detein iha sela no lori ba tribunal atu halo julgamentu. Se kazu ne’ebé komente grave, konserteza sei sulan iha prizaun Bekora no Gleno,” dehan nia.
Daudaun ne’e, nia hatete, PNTL halo koordenasaun ho autoridade lokal sira hodi monta intelijen iha kada bairru nune’e bainhira mosu konfrontasaun sira bele kontatu direta ba Polisia hodi ka’er autór sira.
