DILI: Komisaun Konsiliasaun Organizasaun Nasoins Unidas (KK-ONU) sei anunsia rezultadu finál tratadu foun Fronteira Marítima entre Timor-Leste no Austrália, iha fulan Abríl 2018 nia laran.
Prezidente Komisaun Konsiliasaun Embaixadór, Peter Taksøe-Jensen hateten, hafoin fasilita ekipa nasaun Timor-Leste no Austrália ne’ebé konkorda ona iha tuku 17.00, lokraik, iha loron 6 Marsu 2018, iha Novaiorke sei asina nota tratadu fronteira marítima foun.
Agora Komisaun sei finaliza sira-nia relatóriu kona-ba prosesu ne’e. Relatóriu ne’e sei fó sai ba públiku iha fulan Abríl tinan 2018 nia-klaran.
Antes ne’e, Komisaun Konsiliasaun hala’o nia soru-mutu ikus iha semana kotuk, hahú husi loron 19 Fevereiru 2018, iha Kuala Lumpur ho Timor-Leste no Austrália no Joint Venture ba Greater Sunrise nian.
Parte sira konkorda ona akordu ba tratadu ida ne’ebé delimita fronteira marítima entre sira iha Tasi Timor.
Komisaun mós fasilita nasaun rua ko’alia kona-ba estatutu legál kampu gás Greater Sunrise nian hodi estabelese Rejime Espesiál ida ba Greater Sunrise no dalan hodi dezenvolve rekursu ne’e.
Tratadu ne'e mós estabelese akordu hodi fahe reseita entre governu Timor-Leste no Austrália iha ne’ebé reseita upstream aloka ba parte idak-idak sei la hanesan depende ba benefísiu husi downstream nian.
Prosesu diskusaun ne’e kontinua partisipa husi Prezidente Komisaun Konsiliasaun Embaixadór, Peter Taksøe-Jensen, Xefe Negosiadór Fronteira Marítima, Kay Rala Xanana Gusmão ho ekipa no Xefe Negosiadór Austrália, Gary Quanlan.
