Reniaun Asembleia Jerál Nasaun Unidas ba dala 73 iha Novaiorke sei realiza iha loron 24 too 27 fulan-Setembru tinan ne’e.

Iha loron Sesta (11/08), Ministru Negósiu Estranjeiru no Kooperasaun Dionísio Babo hasoru malu ho Xefe Estadu Lú Olo hodi konsulta Xefe Estadu nia preparasaun ba partisipa reuniaun Asembleia Jerál ONU ne’e.

 “ Ita nia Prezidente Repúblika prontu  atu ba reprezenta TL nasaun iha reuniaun asembleia jerál ONU iha Nova Yorke,’’ dehan nia iha palasiu Prezidensiál-Bairru Pité-Dili, Sesta Foin lalais ne’e.

TL ofisial sai membru ONU nia iha loron 27 fulan-Setembru ne’ebé MNEK fó relatóriu kona ba preparasaun traballu hamutuk mós ekipa divizaun asuntu internasionál sira Prezidente Repúblika nian.

Governante ne’e, espera situasaun iha TL la impede partisipasaun Prezidente Repúblika nia iha Novaiorke hodi bele kontribui ba dezenvolvimentu pás no estabilidade mundu nian.

Tuir ajenda, Prezidente Lú Olo sei arranka husi TL iha loron 20 fulan- Setembru hodi partisipa iha asembleia Jerál ONU iha loron 24 too 27 hafoin Xefe Estadu fila mai TL.

Nia dehan, MNEK so informa preparasaun Xefe Estadu, maibé desizaun ne’e sei foti husi Parlamentu Nasionál maka bele fó autorizasaun.

Maibé, nia dehan, TL hanesan país ida tenke tau importánsia atu Xefe Estadu bele reprezenta país ne’e iha nivél internasionál ne’e, la’ós iha vizibilidade de’it, mas hanesan membru ativu ida Nasaun Unidas nian ba kontribuisaun ba pás no estabilidade mundu nian.

Molok ne’e, Parlamentu Nasionál la fó autorizasaun ba Prezidente Repúblika Francisco Guterres Lú Olo atu hala’o vizita estadu ba nasaun Portugál tanba impase polítika iha Timor Leste.